કપડવંજ તાલુકાનાં આંતરસુંબા ગામના મકાનમાં ઘરેલુ ગેસ લીકેજ થવાના બનાવમાં આગ લાગતાં આખું મકાન બળીને ખાખ થઈ ગયું હતું. જોકે આગ લાગવાના બનાવમાં કોઈ જાનહાનિ થઇ નથી. મળતી માહિતી અનુસાર, આતરસુંબામા વોર્ડ નંબર-5માં આવેલ મહાદેવવાળી ફળીમાં પ્રશાંતભાઇ મહારાજનું મકાન આવેલું છે. સદર મકાનમાં ઘરેલુ ગેસ બોટલની પાઈપ એકાએક જ લીકેજ થવાથી આખા ઘરમાં ભીષણ આગ લાગવાથી સંપૂર્ણ મકાન બળી ને ખાખ થઈ ગયું હતું. આગના બનાવ અંગેની જાણ આતરસુંબાના સરપંચને થતાં તેઓએ તાત્કાલિક કપડવંજ નગરપાલિકાના ઉપપ્રમુખને જાણ કરી હતી. કપડવંજથી તાત્કાલિક ફાયરબ્રિગેડની બંને ગાડી ગણતરીની મિનિટોમાં જ પહોચી આગ પર કાબૂ મેળવવા કામગીરી હાથ ધરી હતી. ઘટના સ્થળે સરપંચ પોતે તથા પંચાયતના તમામ સદસ્યોએ સમયસુચકતા વાપરીને આગ બુઝાવવા પ્રયત્નો ચાલુ કરી દીધા હતા. જેથી કરીને આજુબાજુના મકાનોમાં વધુ આગના પ્રસરે તેવા પ્રયત્નો કર્યા હતા. મોટી દુર્ઘટના અને જાનહાનિ અટકી હતી. ફાયર બ્રિગેડ ટીમે ઘટના સ્થળે પહોચી આગ ઊપર કાબૂ મેળવી લીધો હતો.