છોટાઉદેપુર જિલ્લામાં હેડ કોન્સ્ટેબલ રૂપિયા ૩૫ હજારની લાંચ સ્વીકારતા એસીબીના હાથે પકડાયો છે, જોકે લાંચ મામલે મહિલા પીએસઆઈ સાથે ટેલીફોનીક વાત કરતા મહિલા પીએસઆઈ પણ એસીબીના છટકામાં ભેરવાઈ છે.

મળતી માહિતી અનુસાર એસીબીને ફરિયાદ કરનાર ફરીયાદી પર ઈંગ્લીશ દારુનો કેસ કરેલ હોય જે ગુનાના કામે અટક કરવાના હોય કોર્ટમાં જલ્દી રજુ કરવા,સવલત આપવા માટે છોટાઉદેપુર જિલ્લાના જેતપુર પાવી તાલુકાના કરાલી પોલીસ સ્ટેશનનો હેડ કોન્સ્ટેબલ કિરણકુમાર અમૃતલાલ વસાવાએ રૂ.૪૦,૦૦૦/-ની લાંચની માંગણી કરી હતી. જોકે રકઝકના અંતે રૂ.૩૫,૦૦૦/- આપવાના નક્કી થયેલ. જે લાંચની રકમ ફરીયાદી આરોપીઓને આપવા માંગતા ન હોય એસીબીનો સંપર્ક કરી ફરીયાદ આપી હતી.

એસીબીએ ફરીયાદીની ફરીયાદના આધારે આજરોજ કરાલીના પ્રાથમીક આરોગ્ય કેન્દ્ર પાસે લાંચના છટકાનું આયોજન કરતા હેડ કોન્સ્ટેબલ કિરણકુમાર વસાવાએ ફરીયાદી સાથે હેતુલક્ષી વાતચીત કરી રૂ.૩૫,૦૦૦/- ની લાંચની માંગણી કરેલ અને સ્વીકારતા પહેલા કરાલી પોલીસ સ્ટેશનની મહિલા પીએસઆઈ શ્રીમતિ આર.જે.ચોટલીયા સાથે ટેલીફોનથી હેતુલક્ષી વાત કરી ફરીયાદી પાસેથી રૂ.૩૫,૦૦૦/-ની લાંચની રકમ સ્વીકારતા લાંચીયો હેડ કોન્સ્ટેબલ કિરણ વસાવા સ્થળ ઉપર જ પકડાઇ ગયો હતો.