અડાજણ પાટિયા સ્થિત ધૂમકેતુ નગર પ્રાથમિક શાળા ક્રમાંક-૨૧૮માં સખી મંડળની બહેનોએ ધો.૫ થી ૮ના વિદ્યાર્થીઓ સમક્ષ માટીની ઇકો ફ્રેન્ડલી ગણપતિની પ્રતિમા બનાવવાનું પ્રત્યક્ષ નિદર્શન કર્યું હતું. બાળકોને પ્લાસ્ટર ઓફ પેરિસની પ્રતિમાની જગ્યાએ માટીની પ્રતિમા બનાવતા શીખવાડી તેના ફાયદાઓ અને પર્યાવરણ પ્રત્યે જાગૃત કર્યા હતા.

છેલ્લા ૮ વર્ષોથી સંપૂર્ણપણે ઇકો ફ્રેન્ડલી ગણેશજીની મૂર્તિ બનાવી તેનું વેચાણ કરતા કતારગામના શ્રીજી સખી મંડળની બહેનોએ શાળાના બાળકોને માટીના ગણેશજીની મૂર્તિ બનાવવા વપરાતા મોલ્ડ, માટી, આકાર ઘડતર, મૂર્તિનું રંગકામ, તેના માટે વપરાતા રંગો, શણગારના વસ્ત્રો વિષે વિસ્તારથી જાણકારી આપી હતી. સાથે જ તેમણે બાળકોને પ્લાસ્ટર ઓફ પેરિસમાંથી બનાવાતી મૂર્તિઓથી પર્યાવરણને થતા નુકસાન વિસમજ આપી માટીની મૂર્તિના ફાયદા જણાવ્યા હતા.

સખી મંડળની મહિલાઓએ બાળકોને જવાબદાર નાગરિક બની પોતાના પરિવાર તેમજ પડોશીઓ, મહોલ્લા આસપાસના રહીશોને પણ ઇકો ફ્રેન્ડલી મૂર્તિનું સ્થાપન કરવાની પ્રેરણા આપી હતી., તેમજ જાતે બનાવેલી વેસ્ટમાંથી બેસ્ટ કૃતિઓનું પ્રદર્શન પણ કર્યું હતું.