રાજ્યમાં અકસ્માતની ઘટનાઓમાં સતત ચિંતાજનક વધારો થઈ રહ્યો છે. સુરતમાં પણ આવો અન્ય એક કિસ્સો સામે આવ્યો છે. જ્યાં પેપર મીલમાં કામ કરતાં મહિલાનાં બાળકને પોતાની આંખ સામે એક ટેમ્પો ચાલકે કચડી નાંખ્યો અને ત્યાંથી ફરાર થઈ ગયો હતો. સમગ્ર મામલે પરિવારમાં શોકનો માહોલ છે. પોલીસે સમગ્ર મામલે તપાસ હાથ ધરી હતી. મળતી માહિતી મુજબ, સુરતમાં ગુરૂવારે ટેમ્પો ચાલક બે વર્ષના નાનકડાં બાળકને કચડીને ફરાર થઈ ગયો છે.

સુરત GIDC વિસ્તારમાં રોડ નંબર 13 પાસે પેપરમીલ ખાતે મહિલા કામ કરતી હતી. મહિલા પોતાના બાળકને વ્યવસ્થિત જગ્યાએ સૂવડાવીને કામ કરી રહી હતી. એવામાં પેપરમીલનો જ ટેમ્પો ચાલક આવ્યો અને બાળકને કચડીને ત્યાંથી ફરાર થઈ ગયો. સામેથી તેની માતા ટેમ્પો ચાલકને બૂમો પાડતી દોડીને આવી ત્યાં સુધી તે ફરાર થઈ ગયો હતો અને તેનું બાળક લોહી લોહાણ હાલતમાં પડ્યું હતું. ત્યારબાદ તાત્કાલિક ધોરણે બાળકને હોસ્પિટલ લઈ જવામાં આવ્યું. પરંતુ, હોસ્પિટલ પહોંચે તે પહેલાં જ બાળકનું મોત નિપજ્યું હતું. સમગ્ર મામલે સચિન GIDC પોલીસે આ મામલે અકસ્માતનો ગુનો નોંધી વધુ તપાસ હાથ ધરી હતી. પોલીસ હાલ ટેમ્પો ચાલકને શોધી રહી હતી. બાળકના મૃતદેહને હાલ પોસ્ટ મોર્ટમ માટે ખસેડવામાં આવ્યો છે.