ઉચ્છલ તાલુકાના કરોડ ગામમાં મુંબઈથી નીકળતા વરલી મટકાનો જુગાર રમાડતા એક ઈસમને ઝડપી પાડી પોલીસે કાયદેસરની કાર્યવાહી હાથ ધરી હતી.

મળતી માહિતી મુજબ, ઉચ્છલ પોલીસ સ્ટાફના માણસો ખાનગી વાહનમાં બેસી ગુરુવારે બપોરે 2 વાગ્યાના સમયે પ્રોહી. જુગાર અંગેની રેઈડમાં નીકળેલ હતા. તે દરમિયાન મળેલ ખાનગી બાતમીના આધારે, પોલીસે કરોડ ગામના, પારશી ફળિયામાં ચાલતા વરલી મટકા જુગારના અડ્ડા પર દરોડા પાડ્યા હતા. તે સમય દરમિયાન સ્થળ પરથી ભોલેનાથભાઈ જેમુભાઈ વસાવા જે મુંબઈથી નીકળતા વરલી મટકાના આંક પર હારજીતનો જુગાર રમાડતા પોલીસ રેઈડમાં ઝડપાઈ ગયા હતા. પોલીસે પકડાયેલ ઈસમ પાસેથી જુગારના સાધનો સહિત રોકડ રૂપિયાનો મુદ્દામાલ જપ્ત કરી ભોલેનાથ વસાવા વિરુધ્ધ ઉચ્છલ પોલીસ મથકે ગુનો નોંધી કાયદેસરની કાર્યવાહી ધરવામાં આવી હતી. (મનિષા સુર્યવંશી દ્વારા વ્યારા)