પાંડેસરાના ડુંડીગામ પાસે રહેતી વિધવા મહિલાના મકાનને તસ્કરોઍ નિશાન બનાવી રોકડા ઍક લાખ અને દાગીના મળી કુલ રૂપિયા 1.45 લાખના મતાની ચોરી કરી નાસી ગયા હતા.

પાડેસરા પોલીસના જણાવ્યા મુજબ ડુંડીગામની બાજુમાં વિશ્વકર્મા ઍપાર્ટમેન્ટમાં રહેતા રેણુકાબેન મહેન્દ્રભાઈ મોરે (ઉ.વ.35)ના પતિનું દોઢ વર્ષ પહેલા અવસાન થયા બાદ તેઓ લોકોના ઘરે ઘરકામ અને ઘરે સિલાઈ કામ કરી પરિવારમાં દીકરી અનુષ્કા (ઉ.વ.13) અને દીકરો તિર્થ (ઉ.વ.9 )નું ગુજરાન ચલાવે છે. રેણુકાબેને મજુરી કરી ઍક લાખની બચત કરી કબાટમાં મુક્યા હતા. દરમિયાન ગઈકાલે રાત્રે અજાણ્યાઓ તેમના ઘરમાં ત્રાટક્યા હતા. અજાણ્યાઓઍ  બેડરૂમની બારીમાંથી અંદર ઘુસી કબાટમાં મુકેલા રોકડા 1 લાખ અને દાગીના મળી કુલ રૂપિયા 1,45,700 ના મકાનમાં ચોરી કરી નાસી ગયા હતા. બનાવ અંગે પોલીસે રેણુકાબેનની ફરિયાદ લઈ તપાસ હાથ ધરી છે.