કામરેજ તાલુકાનાં ખોલેશ્વર ગામે એક મકાનમાંથી રૂપિયા 49,200/-ના વિદેશી દારૂના જથ્થા સાથે મહિલા બુટલેગરને એલસીબી પોલીસે ઝડપી પાડી હતી, જ્યારે આ ગુનામાં સંડોવાયેલ 2 જણાને વોન્ટેડ જાહેર કર્યા હતા. સુત્રો પાસેથી મળતી મુજબ, સુરત જિલ્લા એલસીબી પોલીસની ટીમ અલગ અલગ ટીમો બનાવી પેટ્રોલીંગમાં હતી. તે દરમિયાન ખાનગી રાહે બાતમી મળતા, પોલીસે ખોલેશ્વર ગામે રહેતા હસમુખભાઈ ઠાકોરભાઈ વસાવાના ઘરે રેડ કરી હતી.

તે દરમિયાન મકાનમાં સંતાડેલ બીયરના ટીન તેમજ વિદેશી દારૂની કુલ નંગ 384 બોટલ મળી આવી હતી જેની કિંમત રૂપિયા 49,200/- હતી. ત્યારબાદ પોલીસે દારૂનાં જથ્થા સાથે ઘરમાં હાજર મહિલા બુટલેગર અર્ચનાબેન હસમુખભાઈ વસાવાને ઝડપી પાડી હતી. આ વિદેશી દારૂનો જથ્થો હસમુખ વસાવાએ મંગાવ્યો હતો અને આ જથ્થો પૂરો પાડનાર હિતેશ ઉર્ફે લાલુ ગુમાન વસાવા (રહે.ખોલેશ્વર ગામ, તા.કામરેજ) નાઓ ત્યાં હાજર ન મળી આવતા બંનેને પોલીસે વોન્ટેડ જાહેર કરી ગુનો નોંધી આગળની કાર્યવાહી હાથ ધરી હતી.