સુરત શહેરમાં અજાણ્યા બાઇક સવાર સ્નેચરો રાંદેર ગોરાટ પર ત્રાટકયા હતા અને શ્રમજીવી વૃધ્ધાને નિશાન બનાવી રૂપિયા 25 હજારની સોનાની ચેઇન આંચકીને ભાગી ગયા હતા.

 

 

 

રાંદેર ગોરાટ રોડ સ્થિત સુકુન ચાર રસ્તા નજીક તાપી નદીના કિનારે ઝુંપડામાં રહેતી  60 વર્ષીય બચીબેન અશોક પટેલ ગોરાટ વિસ્તારની સોસાયટીઓમાં ઘરકામ કરી બપોરે 12 વાગ્યાના અરસામાં પોતાના ઘરે જઇ રહ્યા હતા. 

 

 

 

તે સમય દરમિયાન ગોરાટ રોડ સ્થિત સંગીની એમ્પીરીયા નજીક એક અજાણ્યો યુવક ચાલતો-ચાલતો આવ્યો હતો અને બચીબેનના ગળામાંથી સોનાની રૂપિયા 25 હજારની ચેઈન આંચકી લઇ નજીકમાં બાઇક લઇ ઉભેલા તેના સાથીદાર સાથે બેસીને ભાગી ગયો હતો. 

 

 

 

આ ઘટના અંગે બચીબેન એ રાંદેર પોલીસ સ્ટેશનમાં બાઇક સવાર સ્નેચરો વિરૂધ્ધ ફરીયાદ નોંધાવી હતી. પોલીસે સ્થાનિક વિસ્તારના સીસીટીવી ફૂટેજના આધારે આગળની કાર્યવાહી હાથ ધરી હતી.