સુરત શહેરનાં પાંડેસરા વિસ્તારમાં આવેલ પ્રભુનગરની સામે કૈલાશ ચોકડીથી ગાંધી કુટિર જતા રોડના ફૂટપાથ ઉપરથી એક અજાણ્યા યુવકની હત્યા કરાયેલી લાશ મળી આવતા પોલીસ દોડતી થઇ ગઇ હતી. હત્યારા દ્વારા અજાણ્યા યુવકને તિક્ષ્ણ હથિયારથી પેટ, છાતી અને ગળાના ભાગે ઘા મારી હત્યા કરી હોવાનું સામે આવ્યું છે. પાંડેસરા પોલીસે હત્યાનો ગુનો નોંધી વધુ તપાસ હાથ ધરી હતી. પાંડેસરા પોલીસે જણાવ્યું હતું કે, સોમવારની મોડી સાંજે પાંડેસરા ગાંધી કુટિર જતા રોડના ફૂટપાથ ઉપર એક અજાણ્યા યુવકની હત્યા કરાયેલી લાશ મળી આવી હતી.જોકે ઘટના અંગેની જાણ પાંડેસરા પોલીસને મળતા પાંડેસરા પોલીસનો સ્ટાફ ત્યાં ઘટના સ્થળે પહોંચી પોલીસે તપાસ કરતા અજાણ્યા યુવકને તિક્ષ્ણ હથિયારથી પેટ, છાતી અને ગળામાં ગંભીર જીવલેણ ઇજા પહોંચાડવામાં આવી હોવાનું તપાસ દરમિયાન ખુલ્યું હતું. પોલીસે અજાણ્યા મરણ જનારની લાશનો કબ્જો લઇ પોસ્ટમોર્ટમ અર્થે નવી સિવિલ હોસ્પિટલ ખાતે ખસેડી હતી. મૃતક યુવકના હાથ પર એક સુનિલ નામનું ટેટૂ પણ છે. બનાવ અંગે પોલીસે હત્યારા સામે હત્યાનો ગુનો નોંધી વધુ કાર્યવાહી હાથ ધરી હતી.