સુરતના બારડોલીના ધૂલિયા ચાર રસ્તા નજીકથી એલસીબી પોલીસે વિદેશી દારૂના જથ્થા સાથે એક ઈસમને ઝડપી પાડ્યો હતો. આ વિદેશી દારૂનો જથ્થો દમણથી ભરી બારડોલી થઈ સુરત શહેરમાં લઈ જવામાં આવી રહ્યો હતો. એલસીબી પોલીસે 1.24 લાખના વિદેશી દારૂ સહિત કુલ 6.28 લાખનો મુદ્દામાલ કબ્જે કર્યો હતો.

સુત્રો પાસેથી મળતી માહિતી અનુસાર, સુરત જિલ્લા એલસીબી પોલીસની ટીમ બારડોલી વિસ્તારમાં પેટ્રોલીંગમાં હતી. તે દરમિયાન બાતમી મળતા પોલીસે બારડોલીના ધુલિયા ચાર રસ્તા નજીક વોચ ગોઠવી હતી. તે સમયે બાતમી મુજબની આઈ-20 કાર નંબર જીજે/19/એએમ/8241 આવતા તેને અટકાવી હતી અને ચાલકને નીચે ઉતારી કારમાં તપાસ કરતાં તેમાંથી વિદેશી દારૂની કુલ 1344 નંગ બોટલો મળી આવી હતી જેની કિંમત રૂપિયા 1,24,800/-નો જથ્થો મળી આવ્યો હતો. પોલીસે કાર ચાલક સાદીક કલીમ કુરેશી (રહે.એસ.એન.રેસીડન્સી,હલધરું ગામ,કામરેજ) ની ધરપકડ કરી હતી. આ વિદેશી દારૂનો જથ્થો દમણથી કારમાં ભરી મહુવા બારડોલી થઈ સુરત શહેરમાં લઈ જવામાં આવી રહયો હતો. પોલીસે વિદેશી દારૂ, કાર તેમજ રોકડ રકમ અને મોબાઈલ ફોન મળી કુલ રૂપિયા 6,28,300/-નો મુદ્દામાલ કબ્જે કરી ગુનો નોંધી આ વિદેશી દારૂ ભરી આપનારને વોન્ટેડ જાહેર કરી આગળની કાર્યવાહી હાથ ધરી હતી.