સુરતના પલસાણા તાલુકાનાં જોળવા ગામની સીમમાં હાઇવે ઉપરથી પસાર થઈ રહેલ કારને પાછળથી અજાણ્યા વાહન ચાલકે ટક્કર મારતા કાર પલટી મારી રેલિંગ ઉપર ચઢી ગઈ હતી. જોકે, અકસ્માતમાં કાર ચાલકનો આબાદ બચાવ થયો હતો.

સુત્રો પાસેથી મળતી માહિતી અનુસાર, પલસાણાનાં જોળવા પાટીયા નજીક હાઇવે ઉપર કાર નંબર જીજે/05/આરડી/1696નો ચાલક કાર લઈ બારડોલીથી કડોદરા તરફ જઈ રહ્યો હતો. તે સમયે વાહન ચાલકે કારને પાછળથી ટક્કર મારી હતી અને કાર આગળ ચાલતા અન્ય વાહન સાથે અથડાયા બાદ પલ્ટી મારી હાઇવે ઉપર બનાવવામાં આવેલ રેલિંગ પર ચઢી ગઈ હતી. જોકે, આ અકસ્માતમાં ચાલકનો આબાદ બચાવ થયો હતો. ઘટનાની જાણ થતાં જ પોલીસ સ્થળ ઉપર આવી પહોંચી હતી અને આગળની કાર્યવાહી શરૂ કરી હતી.