સુરતમાં વહેલી સવારથી પડી રહેલાં વરસાદના કારણે અનેક જગ્યાએ પાણી ભરાતા જન જીવન પર અસર પડી રહી છે. જ્યાંથી રોજ હજારો લોકોની અવરજવર હોય છે તે ડીંડોલી રેલ્વે ગરનાળામાં પાણી ભરાતા લોકોની હાલત કફોડી બની ગઈ છે. જયારે નોકરી ધંધા પર જવાનું હોવાથી લોકોએ મજબૂરીથી ભરાયેલા પાણી માંથી પસાર થવું પડી રહયુ છે.

સુરતમાં રવિવારથી શરૂ થયેલા વરસાદથી ગરમીમાં રાહત છે પરંતુ ગતરોજ રાતથી આજ સવાર સુધી વરસાદની ધમાકેદાર બેટિંગથી લોકોની હાલત કફોડી બની ગઈ છે. વરસાદના કારણે સુરતના અનેક વિસ્તારમાં પાણી ભરાતા લોકોની મૂશ્કેલી વધી છે. તેમાં પણ આજે વહેલી સવારે પડેલા વરસાદને કારણે ડીંડોલી રેલવે ગરનાળામાં પાણી ભરાઇ ગયા હતા. આ ગરનાળાનો ઉપયોગ કરી હજારો લોકો નોકરી ધંધા પર જતા હોય છે. નોકરી પર પહોંચવાનું હોવાથી લોકો મજબૂરીના કારણે પાણી માંથી પસાર થતા હતા ત્યારે સંખ્યાબંધ લોકોના વાહન બંધ પડી ગયા હતા. દર વર્ષે વધારે વરસાદ પડે છે ત્યારે રેલ્વે ગરનાળા ઉપરાંત અન્ય જગ્યાની હાલત આવી જ થાય છે તેમ છતાં તંત્ર દ્વારા કોઈ કામગીરી કરવામાં આવતી નથી જેને કારણે લોકોની હાલત કફોડી થઈ ગઈ છે.