સુરતના ઘોડદોડ રોડ વિસ્તારમાં રહેતા વેપારીને પીપલોદ સારથી રેસીડેન્સીમાં આવેલ ફ્લેટ બેન્કમાં મોર્ગેજમાં મુકેલ હોવા છતાંયે વેચાણ કરી રૂપિયા ૩૯ લાખ પડાવી દસ્તાવેજ બનાવી નહી આપી છેતરપિંડી કરનાર પાની દંપતિ સામે પોલીસે ગુનો દાખલ કરી એક આરોપીની ધરપકડ કરી હતી.

 

 

 

 

 

ઉમરા પોલીસના જણાવ્યા મુજબ, ઘોડદોડ રોડ આભુષણ એપાર્ટમેન્ટમાં ફ્લેટ નં-૧૦૧માં રહેતા અને યાર્નના ધંધા સાથે સંકળાયેલા તુષારભાઈ રજનીકાંત શાહએ ગતરોજ નિલીમાં પુરેન્દ્ર પાની અને પુરેન્દ્ર પાની (રહે.મંગલમ પેલેસ આગમ વર્લ્ડની સામે,વેસુ) સામે ફરિયાદ નોંધાવી હતી. જેમાં જણાવ્યું હતું કે, તેઓના આરોપીઓ પાસેથી ફેબ્રુઆરી-૨૦૧૮માં તેમના પાસેથી પીપલોદ સારથી રેસીડેન્સીમાં નવમાં માળે આવેલ ફ્લેટ નંબર-૯૦૪ રૂપિયા ૩૯ લાખમાં ખરીદ્યો હતો. તુષારભાઈએ આ પૈસા રોકડ રકમ, ચેક અને આરટીજીએસ દ્વારા ચુકવ્યા હતા. જોકે,આરોપી પાની દંપતિએ ફ્લેટ ઓલરેડે એચડીએફસી બેન્કમાં મોર્ગેજમાં મુકેલો હોવાની વાત છુપાવી ફ્લેટના ટાઈટલ ક્લીયર હોવાનુ જણાવ્યું હતું.

 

 

 

 

 

આ ઉપરાંત તુષારભાઈ સિવાય શરદ મનોહર ઘરડે અને તેની પત્નીના નામે પણ સાટાખત બનાવી આપ્યા હતા. આ અંગેની જાણ થતા તુષારભાઈએ તેના પૈસા પરત માંગતા આરોપી દંપતિએ સમાધાન કરી રૂપિયા ૨૨ લાખના ચાર ચેકો આપ્યા હતા. જે ચેક તુષારભાઈએ તેમના બેન્કના ખાતામાં જમા કરાવતા પુરતુ બેલેન્સ ન હોવાના શેરા સાથે રિર્ટન થયા હતા. આરોપીઓએ ફ્લેટના દસ્તાવેજ બનાવી નહી આપી તેમજ ફ્લેટ પેટે લીધેલા રૂપિયા ૩૯ લાખ નહી આપી છેતરપિંડી કરતા આખરે તુષારભાઈએ ગતરોજ ફરિયાદ નોંધાવતા પોલીસે દંપતિ સામે ગુનો દાખલ કરી પુરેન્દ્ર પાનીની ધરપકડ કરી હતી.