સુરતનાં માંડવી તાલુકાનાં ઉશ્કેર ગામે આવેલ રામકુંડ મહાદેવ મંદિરે દર્શન કરવા આવેલ સુરતનો યુવક રામકુંડના ઊંડા પાણીમાં નાહવા માટે ઉતરતા તેનું ડૂબી જવાથી મોત નીપજયું હતું. સુત્રો પાસેથી મળતી માહિતી અનુસાર, પાંડેસરા ખાતે દુર્ગાનગરમાં રહેતો અને મૂળ યુ.પી.ના અમેઠી જિલ્લાના અમીયા ગામનો વતની રામ વિનોદ સિંહ કે જે ગતરોજ સુરતનાં માંડવી તાલુકાનાં ઉશ્કેર ગામે રામકુંડ મહાદેવ મદિરે દર્શન કરવા માટે આવ્યો હતો અને દર્શન કર્યા બાદ તે રામકુંડના ઊંડા પાણીમાં નાહવા માટે ઉતર્યો હતો. તે દરમિયાન તેનું ઊંડા પાણીમાં ડૂબી જવાથી મોત નીપજયું હતું. બનાવ અંગે માંડવી પોલીસે અકસ્માત મોતનો ગુનો નોંધી આગળની કાર્યવાહી હાથ ધરી હતી.