સુરત શહેર ખાતે રહેતા અને કાપડનો વેપાર કરતો યુવક કામરેજના નનસાડ ખાતે તેના મિત્રને ત્યાં ગયો હતો અને જ્યાં રાત્રિ રોકાણ કર્યું હતું તે સમયે સોસાયટીની બહાર પાર્ક કરેલ 2.50 લાખની કિંમતની કાર રાત્રિ દરમિયાન કોઈ અજાણ્યા તસ્કરો ચોરી કરી ગયા હતા.

સુત્રો પાસેથી મળતી માહિતી અનુસાર, સુરત શહેરના સરથાણા જકાતનાકા ખાતે સંકલ્પ એપાર્ટમેંટમાં રહેતા નરેન્દ્રભાઈ દેવશીભાઈ ચોવટીયા જે પલસાણા તાલુકાનાં જોળવા ખાતે કાપડનું કારખાનું ચલાવે છે અને જે પોતાની કાર નંબર જીજે/05/સીપી/1525 લઈ કામરેજના નનસાડ ગામે આવેલ મારુતિ વિલા સોસાયટીમાં રહેતા મિત્ર હિતેશના ઘરે વેપારના કામ અર્થે ગયા હતા અને તેમણે તેમની કાર સોસાયટીની વાડી નજીક મેઇન રોડ ઉપર પાર્ક કરી હતી અને બીજા દિવસે કામ અર્થે સેલવાસ જવાનું હોવાથી તેઓ મિત્રને ત્યાં જ રાત રોકાયા હતા અને રાત્રિના સમયે કોઈ અજાણ્યા તસ્કરો 2.50 લાખની કિંમતની કારની ચોરી કરી ભાગી ગયા હતા. આ બનાવ અંગે કામરેજ પોલીસે ગુનો નોંધી આગળની કાર્યવાહી હાથ ધરી હતી.