સુરતના પલસાણા તાલુકાનાં કડોદરા ચાર રસ્તા નજીક રોડ ક્રોસ કરી રહેલ આધેડને અજાણ્યા બાઈકના ચાલકે ટક્કર મારતા આધેડને માથામાં તેમજ શરીરે ગંભીર ઇજા પહોંચતા મોત નીપજયું હતું. સૂત્રો પાસેથી મળતી માહિતી અનુસાર, પલસાણાનાં કડોદરા ચાર રસ્તા નજીક કડોદરા બારડોલી રોડ પર સત્યમ હોસ્પિટલની સામે ફૂટપાથ ઉપર આવેલ પડાવમાં રહેતા નાથાભાઈ મઘાભાઈ સુનૈયવાળા ફૂટપાથ પર રહી આજુબાજુના વિસ્તારમાં જઈ કટલરીનો સામાન વેચી ગુજરાન ચલાવે છે.

જોકે ગત તા.11ના રોજ તેઓ સવારે કટલરીનો સામાન વેચવા ગયા હતા અને સાંજના સમયે પરત પડાવ ઉપર આવી સામે આવેલ હળપતિ વાસમાં જમવા માટે ગયા હતા અને રાત્રિના 9 વાગ્યાની આસપાસ જમીને પરત પડાવ ઉપર આવવા નીકળ્યા હતા અને રોડ ક્રોસ કરી રહ્યા હતા. તે સમયે પૂરઝડપે હંકારી આવેલ એક અજાણ્યા બાઈકનો ચાલક નાથાભાઈને અડફેટે લઈ ભાગી છૂટ્યો હતો અને સર્જાયેલ આ  અકસ્માતમાં નાથાભાઈને માથામાં તેમજ શરીરના ભાગે ગંભીર ઇજા પહોંચતા ઘટના સ્થળ ઉપર જ મોત નીપજયું હતું. બનાવ અંગે કડોદરા પોલીસે ગુનો નોંધી આગળની કાર્યવાહી હાથ ધરી હતી.