સુરતનાં માંગરોળ તાલુકાનાં મહુવેજ ગામની સીમમાં આવેલ આશીર્વાદ હોટલના કમ્પાઉન્ડ માંથી કોસંબા પોલીસે વિદેશી દારૂ ભરેલ એક ટ્રક ઝડપી પાડી હતી અને ટ્રક માંથી 24.73 લાખનો જથ્થો મળી આવ્યો હતો. પોલીસે ટ્રક તેમજ વિદેશી દારૂ મળી કુલ રૂપિયા 34.79 લાખનો મુદ્દામાલ કબ્જે કરી ટ્રકના ચાલકને વોન્ટેડ જાહેર કર્યો હતો. સુત્રો પાસેથી મળતી માહિતી અનુસાર, કોસંબા પોલીસ સ્ટાફના માણસોને ખાનગી રાહે બાતમી મળી હતી કે, મહુવેજ ગામની સીમમાં મુંબઈથી અમદાવાદ તરફ જતાં નેશનલ હાઈવે નંબર-48 ઉપર આવેલ આશીર્વાદ હોટલના કમ્પાઉન્ડમાં પહોંચ્યા હતા. જ્યાં તેઓને બાતમી મુજબનો એક ટ્રક નંબર એમએચ/04/જેયુ/8621 જોવા મળી હતી.પરંતુ ટ્રકનો ચાલક ત્યાં હાજર મળી આવ્યો ન હતો જોકે કોસંબા પોલીસે ટ્રકની પાછળના ભાગે તપાસ કરતાં તેમાંથી વિદેશી દારૂની કુલ 17388 નંગ બોટલ મળી આવી હતી જેની કિંમત રૂપિયા 24,73,200/- હતી તેમજ ટ્રક માંથી 1 નંગ મોબાઈલ અને રોકડા 6,070/- મળી કુલ રૂપિયા  34,79,770/-નો મુદ્દામાલ કબ્જે કરી ટ્રકના ચાલક અલ્લારખા તમાસી ખાનને વોન્ટેડ જાહેર કરી કોસંબા પોલીસે ગુનો નોંધી આગળની કાર્યવાહી હાથ ધરી હતી.