સુરત શહેરના અશ્વનિકુમાર ભવાની સર્કલ પાસે કાપડની ફેક્ટરીમાં ભીષણ આગ લાગી હોવાની ઘટના સામે આવી છે. બનાવની જાણ થતા આગ પર કાબુ મેળવવા ફાયર બ્રિગેડની ગાડીઓ ઘટનાસ્થળે પહોંચી ગઇ હતી.

સુરતના વરાછા વિસ્તારમાં આવેલ એકે રોડ ખાતેની શ્રી લબ્ધી નામની કાપડ મિલમાં ભીષણ આગ લાગતા ભાગદોડ મચી જવા પામી હતી. ચાલુ મિલમાં આગ લાગતા અનેક મજુરો ફસાયા હતા. જે બાબતે તાત્કાલિક ફાયર-બ્રિગેડને જાણ કરવામાં આવતા ફાયર-બ્રિગેડની 10થી વધુ ગાડીઓ ઘટના સ્થળે દોડી આવી હતી અને પાણીનો મારો ચલાવી આગ પર કાબુ મેળવવા પ્રયાસ હાથ ધરવામાં આવ્યો હતા. જોકે મિલમાં મોટા પ્રમાણમા કાપડ હોવાના કારણે આગે વિકરાળ સ્વરૂપ ધારણ કરી લેતા ફાયર-બ્રિગેડની ટીમે ભારે જહેમત બાદ આગ પર કાબુ મેળવી લીધો હતો અને ફસાયેલા મજુરોને ફાયર-બ્રિગેડની ટીમ  દ્વારા રેસ્ક્યુ કરવામાં આવ્યા હતા અને ઈજાગ્રસ્તોને સારવાર હેઠળ ખસેડવામાં આવ્યા હતા. આ ઘટનાની જાણ થતા શહેરના મ્યુ.કમિશનર ઘટના સ્થળે પહોંચી ગયા હતા.