મહુવા તાલુકાનાં અનીતભાઈ બાલસિંગભાઈ પટેલ દાદર નગરહવેલી ખાતેની નરોલી સ્થિત રિલાયન્સ એન્ટરપ્રાઈઝ પ્રા.લિ. કંપનીમાં નોકરી કરતા હતા અને તેની સાથે ફરજ બજાવતા કંપનીના સહકર્મી તુલારામ કુશવાહની સાથે તુલારામના છોકરાની ઉનાઈ માતા મંદિરે બાધા માની હોવાથી તે પૂરી કરવા માટે નીકળ્યા હતા.

અનીતભાઈ એ પાડોશી રણજિતભાઈની હીરો સ્પલેન્ડર પ્લસ મોટરસાઈકલ નંબર જીજે/21/બીએલ/3705 ઉપર ઉનાઈ જવા નીકળ્યા હતા. અનીતભાઈ બાઈક ચલાવતા હતા અને પાછળ તુલારામ તેમનો છોકરો અનિલને લઈને બેઠા હતા ત્યારબાદ વાપી હાઈવે ઉપર વલસાડી ઝાંપા જકાતા નાકા પાસે બ્રિજ ઉપરથી સવારે પોણા પાંચના સુમારે પસાર થતા હતા. તે સમય દરમિયાન એક ટાટા કંપનીના ટેન્કર નંબર જીજે/12/બીટી/8247નાં ચાલકે પુરઝડપે અને ગફલત ભરી રીતે હંકારી લાવીને બાઈકને ટક્કર મારી હતી. ટક્કર મારતાં જ બાઈક પર સવાર ત્રણેય સવાર રોડ પર પટકાયા હતા જે પૈકી તુલારામના માથા પરથી ટેન્કરનું વ્હીલ ફરી જતા તેનું ઘટના સ્થળે જ મોત નીપજ્યું હતું, જયારે અનીતભાઈ અને બાળકને સામાન્ય ઈજાઓ પહોંચી હતી. આ અકસ્માત અંગે અનીત ભાઈ પટેલએ વાપી ટાઉન પોલીસને ફરિયાદ આપતા પોલીસે ટેન્કર ચાલક સામે ફેટલ અકસ્માતનો ગુનો નોંધી તપાસ હાથ ધરી હતી.