વિધાનસભા સામાન્ય ચૂંટણીઓ-2022ને અનુલક્ષીને સમગ્ર રાજ્યમાં લોકોને મતદાન અંગે જાગૃત કરવા માટે વિવિધ પ્રવૃત્તિઓ હાથ ધરવામાં આવી રહી છે. ડાંગ જિલ્લામાં પણ જિલ્લા ચુંટણી અધિકારી અને જિલ્લા કલેક્ટરનાં માર્ગદર્શન હેઠળ અને સ્વીપ એક્ટીવિટીનાં નોડલ અધિકારી દ્વારા સ્વીપ એક્શન પ્લાન અંતર્ગત કાર્યક્રમો યોજાઈ રહ્યાં છે. જે મુજબ આહવા તાલુકાની ચિંચલી આદર્શ માધ્યમિક શાળાનાં વિદ્યાર્થીઓએ ગામમા મતદાન અંગે જાગૃતિ રેલી કાઠીને વાલીઓ અને ગ્રામજનોને મતદાન અંગે જાગૃત કર્યા હતા.

લોકશાહિનાં પર્વ સાથે નવા ભારતનાં નિર્માણ અને શ્રેષ્ઠ ભારતની પરિકલ્પનાને સાચા અર્થમા સાકાર કરવા મતદાન પ્રક્રિયામાં ભાગ લેવા માટે વિધ્યાર્થીઓ થકી ગ્રામજનોને જાગૃત કરાયા હતા. શાળાના આચાર્ય દ્વારા વિદ્યાર્થીઓને મતદાનના મહત્વ વિશે સમજણ આપી હતી. આદર્શ માધ્યમિક શાળા ચિંચલીના બાળકો દ્વારા મતદાન જાગૃતિ સંકલ્પ કરી મતદાન જાગૃતિ રેલી યોજવામાં આવી હતી. આ રેલીમાં શાળાનાં શિક્ષકો તેમજ વિદ્યાર્થીઓએ ભાગ લીધો હતો. અત્રે ઉલ્લેખનીય છે કે, શાળા પરિવાર દ્વારા બાળકોને મતદાન અંગે જાગૃતિ માટે અનેકવિધ કાર્યક્રમોનું આયોજન કરવામાં આવી રહ્યું છે. જેથી બાળકો પણ પોતાના વાલીઓને મતાધિકારનો ઉપયોગ કરવા અંગે જાગૃત કરી એક નાગરિક તરીકેની ફરજ બજાવી શકે.