સોનગઢમાં મારામારી ગુનામાં સંડોવાયેલા અને તડીપાર કરાયેલા આરોપીને પોલીસ સ્ટાફના માણસોએ આજરોજ ખાંજર ગામમાંથી ઝડપી પાડ્યો હતો.

પોલીસ સુત્રો પાસેથી મળતી માહિતી અનુસાર તાપી જીલ્લાના સોનગઢના અમલનપાર્કમાં રહેતો તોસીફખાન આઝમખાન પઠાણ અગાઉ (શરીર સબંધી) મારામારીના ગુનામાં પોલીસને હાથે ઝડપાઈ ગયો હતો. વ્યારાના સબડિવિઝનલ મેજિસ્ટ્રેટે તેને બે વર્ષની મુદ્દત માટે તાપી,સુરત સીટી અને ગ્રામ્ય,નવસારી,વલસાડ, આહવા-ડાંગ,ભરૂચ અને નર્મદા જીલ્લાની હદ છોડી જવા તથા બે વર્ષ માટે તડીપાર કર્યો હતો.

તોસીફખાન પઠાણ કેટલાક વખતથી સોનગઢ વિસ્તારમાં ફરતો હોવાની બાતમી પોલીસને મળતા સોનગઢ પોલીસ સ્ટાફના માણસોએ સોનગઢના ખાંજર ગામના બગદવડી ફળીયામાં આવેલ ક્રિકેટ મેદાન પાસેથી આરોપી તોસીફખાન પઠાણને ઝડપી પાડ્યો હતો. બનાવ અંગે હેડકોન્સ્ટેબલ સરજીતભાઈ બચુભાઈની ફરિયાદના આધારે આરોપી તોસીફખાન પઠાણ વિરુધ્ધ જીપી એક્ટ કલમ 142 મુજબ સોનગઢ પોલીસ મથકે ગુનો દાખલ કરી આગળની કાર્યવાહી હાથ ધરવામાં આવી છે.