લોકસભા ચૂંટણીમાં NDAને બહુમતી મળી છે અને તે ત્રીજી વખત સત્તામાં આવવા જઈ રહી છે. નવી સરકારના શપથ ગ્રહણની તારીખ અને સમય પણ નક્કી કરવામાં આવ્યો છે. સૂત્રોનું કહેવું છે કે, વડાપ્રધાન નરેન્દ્ર મોદીનો શપથ ગ્રહણ સમારોહ તારીખ 8મી જૂને સાંજે યોજાઈ શકે છે. રાષ્ટ્રપતિ ભવન દ્વારા જાહેર કરાયેલા નિવેદનનું માનીએ તો નવી સરકાર ટૂંક સમયમાં શપથ લઈ શકે છે. આજે રાષ્ટ્રપતિ દ્રૌપદી મૂર્મુ પણ મોદી કેબિનેટને વિદાય ડિનર આપશે.

રાષ્ટ્રપતિ ભવન ખાતે રાત્રે 8 વાગ્યાથી આ ભોજન સમારંભનું આયોજન કરવામાં આવશે. નોંધનીય છે કે, 17મી લોકસભાનો કાર્યકાળ 16 જૂન 2024નાં રોજ પૂરો થઈ રહ્યો છે. એટલે કે તારીખ 16 જૂન પહેલા નવી સરકારની રચના થઈ જશે. લોકસભા ચૂંટણી 2024નાં  પરિણામોની વાત કરવામા આવે તો ભારતીય જનતા પાર્ટી (BJP)એ સૌથી વધુ 240 બેઠકો જીતી છે જ્યારે કોંગ્રેસને 99 બેઠકો મળી છે. પરિણામો અનુસાર એનડીએને  292 બેઠકો મળી છે. જોકે આ ચૂંટણીમાં I.N.D.I.A. ગઠબંધનને 234 બેઠકો મળી છે.