ભરૂચમાં બનેલ એક એવી શર્મજનક ઘટના જેમાં આચાર્યનાં ગંદા કૃત્યથી સમગ્ર પંથકમાં અરેરાટી વ્યાપી ગઈ છે. બનાવની વિગત એવી છે કે, સરસ્વતિ વિધાલયમાં ધોરણ-10માં ભણતી એક વિદ્યાર્થિનીને નાપાસ કરવાની ધમકી આપી શાળાનો આચાર્ય વારંવાર દુષ્કર્મ ગુજારતો હોવાનુ સામે આવ્યું હતું. જોકે માસૂમ વિદ્યાર્થિની આવાં શારીરિક ત્રાસથી બચવા માટે શાળાએ જવાની આનાકાની કરતી હતી પણ વિદ્યાર્થિનીની હાલત એવી હતી કે, ના કોઇને કહેવાય કે પછી નાં સહેવાય જેવી થઈ ગઈ હતી. ત્યારે ગત તા. 30 ઓગસ્ટનાં રોજ આચાર્ય દ્વારા ફરી એકવાર દુષ્કર્મ ગુજારવામાં આવ્યું હતું.

તદ્દઉપરાંત શનિવારનાં રોજ પણ આચાર્ય દ્વારા શારીરિક અડપલા કરાતાં વિદ્યાર્થીની એકદમ ગભરાઈ ગઈ હતી અને આચાર્યની કેબિન માંથી ગભરાઈને બહાર દોડી આવી હતી અને પોતાની બહેનને ફોન કરતા તે પણ દોડી આવી પોતાની બહેન પર થતાં શારીરિક અત્યાચાર અંગેની ચોંકાવનારી વિગતો જાણી હતી. બનાવ અંગે વિદ્યાર્થિનીની માતાએ બી ડિવિઝન પોલીસ મથક ખાતે પોલિસ ફરીયાદ નોંધાવતા પોલીસે આરોપીની ધરપકડ કરી તપાસ હાથ ધરી હતી.