બોલીવૂડ અને ટીવી ઇન્ડસ્ટ્રીથી એક દુખદ સામે આવ્યા છે. 'દિલ ચાહતા હે' ફેમ એક્ટર રિયો કપાડિયાનું નિધન થઇ ગયું છે. તે 66 વર્ષના હતા. તેમના અંતિમ સંસ્કાર આવતીકાલે મુંબઈમાં થશે. જોકે મૃત્યુનું કારણ હજુ સુધી સામે આવ્યું નથી. રિયોએ ઘણી ટીવી સિરિયલ્સ અને ફિલ્મોમાં કામ કર્યું હતું. તેણે આમિર ખાન, શાહરૂખ ખાન અને રાની મુખર્જી સાથે પણ કામ કર્યું હતું. રિયોના મિત્ર ફૈજલ મલિકે તેમના નિધનના સમાચારની પુષ્ટિ કરતા કહ્યું, 'ખુબ જ દુખ સાથે કહેવું પડી રહ્યું છે કે, હવે રિયો અમારી વચ્ચે રહ્યા નથી.

તેઓએ આજે બપોરે 12:30 વાગ્યે અંતિમ શ્વાસ લીધા હતા. આવતીકાલે તેમના અંતિમ સંસ્કાર કરવામાં આવશે. બાકીની વિગતો સાંજ સુધીમાં પરિવાર દ્વારા જાહેર કરવામાં આવશે.રિયો છેલ્લે OTT પ્લેટફોર્મ પર રિલીઝ થયેલી વેબ સિરીઝ 'મેડ ઇન હેવન 2'માં જોવા મળ્યો હતો. આ અગાઉ રિયોએ વર્ષ 2021માં અભિષેક બચ્ચન સાથે 'ધ બિગ બુલ'માં કામ કર્યું હતું. આ ઉપરાંત તેઓ હેપ્પી ન્યુ યર, મર્દાની, પ્રધાનમંત્રી, હમ હૈ રાહી પ્યાર કે, શ્રી, એક અનહોની, મુંબઈ મેરી જાન, દિલ ચાહતા હૈ અને ચક દે ઇન્ડિયા જેવી ફિલ્મોમાં પણ કામ કર્યું હતું. ટીવી ઇન્ડસ્ટ્રીમાં રિયો ખુબ એક્ટિવ હતા. પોપ્યુલર ટીવી સિરિયલ મહાભારતમાં તેમણે પાંડુની ભૂમિકા ભજવી હતી.