યુએસ ડોલર સામે સોમવારે એટલે કે આજે શરૂઆતના વેપારમાં રૂપિયો 31 પૈસાની સર્વકાલીન નીચી સપાટીએ સરકી ગયો હતો. સોમવારે શરૂઆતી કારોબારમાં રૂપિયો 80.15 પર ટ્રેડ થતો જોવા મળ્યો હતો. બજારના જાણકારોના મતે વૈશ્વિક બજારમાં અમેરિકી ચલણની મજબૂતાઈ અને ક્રૂડ ઓઈલના ભાવમાં વધારાને કારણે આ ઘટાડો નોંધાયો છે.

ઇન્ટરબેંક ફોરેન એક્સચેન્જ માર્કેટમાં,ડોલર સામે રૂપિયો 80.10 પર ખૂલ્યો હતો,જે પાછળથી વધુ ઘટાડા સાથે 80.15 પર નોંધાયો હતો, જ્યાં અગાઉના બંધની સામે તેણે 31 પૈસાની નબળાઈ નોંધાવી હતી. ગત ટ્રેડિંગ સેશનમાં શુક્રવારે ડોલર સામે રૂપિયો 79.84ના સ્તર પર બંધ થયો હતો.

દરમિયાન,ડોલર ઇન્ડેક્સ,છ મુખ્ય ચલણો સામે યુએસ ડોલરની સ્થિતિને પ્રતિબિંબિત કરે છે,0.51 % વધીને 109.35 પર પહોંચ્યો હતો. ફોરેક્સ ટ્રેડર્સે જણાવ્યું હતું કે, ફેડરલ રિઝર્વે ફુગાવાને કાબૂમાં લેવા માટે કડક વલણ અપનાવવાની હાકલ કર્યા બાદ ડોલર મજબૂત થયો હતો.

પ્રોવિઝનલ સ્ટોક માર્કેટ ડેટા અનુસાર, વૈશ્વિક તેલ બેન્ચમાર્ક બ્રેન્ટ ક્રૂડ ફ્યુચર્સ 0.86 % વધીને 101.86 ડોલર પ્રતિ બેરલ પર ટ્રેડ કરી રહ્યાં છે. વિદેશી સંસ્થાકીય રોકાણકારોએ શુક્રવારના રોજ રૂ. 51.12 કરોડના શેરનું વેચાણ કર્યું હતું.