વડાપ્રધાન નરેન્દ્ર મોદીએ દિલ્હી યુનિવર્સિટીના શતાબ્દી સમારોહમાં લોક કલ્યાણ માર્ગનાં મેટ્રો સ્ટેશનથી વિશ્વ વિદ્યાલય સ્ટેશને મેટ્રો દ્વારા મુસાફરી કરી હતી. યુનિવર્સિટીના આ શતાબ્દી સમારોહમાં વડાપ્રધાન નરેન્દ્ર મોદીને આશિર્વચન આપવા મળેલાં આમંત્રણના પગલે મેટ્રો દ્વારા તેમણે કરેલી મુસાફરી દરમિયાન તેઓએ સહપ્રવાસી વિદ્યાર્થીઓ સાથે ખુલ્લાં મને વાતચીત કરી હતી. તેઓના પ્રશ્નો જાણ્યા હતા. અભ્યાસ વિષે પણ ખાસ કરીને પૂછ્યું હતું.

આ પૂર્વે ગુરૂવારે તેઓનાં ટ્વિટર ઉપર કરેલા પોસ્ટરમાં જણાવ્યું હતું કે, તારીખ 30મી જૂને 11.00 વાગે દિલ્હી યુનિવર્સિટીના યોજાનારા શતાબ્દી સમારોહમાં ઉપસ્થિત રહેવાની હું આશા રાખું છું. એક શતાબ્દી સુધી આ યુનિવર્સીટીએ અગ્રીમ વિદ્યા કેન્દ્ર તરીકે દેશની બુધ્ધિ શક્તિ અને મેધાને પોષણ આપ્યું છે. આ સીમા ચિન્હ સુધી પહોંચવા માટે દિલ્હી યુનિવર્સિટીને અભિનંદન. તેઓની આ મુલાકાત દરમિયાન વડાપ્રધાન નરેન્દ્ર મોદી યુનિવર્સિટી કેમ્પસમાં ઉત્તરના ભાગે કોમ્પ્યુટર સેન્ટર અને ફેકલ્ટી ઓફ ટેકનોલોજીનાં નવા સંકુલ (મકાન) માટે શિલાન્યાસ કર્યો હતો.