અંકલેશ્વરના જ્યોતિ ટોકીઝ પાસે બસની રાહ જોઈને ઉભેલ મહિલાના ગળામાં રહેલ સોનાની ચેન સાથેનું પેન્ડલ આંચકી ફરાર થયેલા લબરમુછીયા સહિત બે ચેઈન સ્નેચરોને પોલીસે ફિલ્મી ઢબે પીછો કરી ઝડપી પાડી કાયદેસરની કાર્યવાહી હાથ ધરી હતી. મળતી માહિતી અનુસાર, હાંસોટ તાલુકાના અણીયાદ્રા ગામની નવી નગરીમાં રહેતા રમીલાબહેન પટેલ ખરીદી કરવા માટે અંકલેશ્વર ખાતે આવ્યા હતા. જેઓ ખરીદી કરી જ્યોતિ ટોકીઝ પાસે બસની રાહ જોઈને બેઠાં હતા.

તે સમયે પાછળથી ધસી આવેલા અજાણ્યા બે ઇસમો પૈકી એકે મહિલાએ ગળામાં પહેરેલ પેન્ડલ સાથેની રૂ.૧.૨૬ લાખ સોનાની ચેઈન તોડી ફરાર થઈ ગયો હતો. તે સમયે મહિલાએ બુમરાણ મચાવતા અન્ય લોકો દોડી આવ્યા હતા. તે દરમિયાન બે પૈકી એક ઈસમે ટોળાને ચપ્પુ બતાવી બાઈક લઈ હાંસોટ તરફ ભાગવા જતા મહિલા અન્ય બાઈક સવાર સાથે ચેઈન સ્નેચરોનો પીછો કર્યો હતો. તે સમયે પોલીસે પણ ફિલ્મી ઢબે પીછો કરી લબરમુછીયા સહિત બેચેઈન સ્નેચરોને ઝડપી પાડ્યા હતા. પોલીસે આરોપી અને મૂળ ઉત્તરપ્રદેશ ખાતે રહેતા અભિષેક પટેલ સાથે અન્ય એક સગીરની ધરપકડ કરી છે. આરોપીઓ ચોરીની બાઈક લઈને ચેઈન સ્નેચિંગ કરવા જતા હોવાનું પોલીસ તપાસમાં બહાર આવ્યું છે. અગાઉ આરોપીઓએ કેટલા ગુનાને અંજામ આપ્યો છે. પોલીસે તપાસ આદરી હતી.