ગાંધીનગર શહેર તેમજ આસપાસના વિસ્તારોમાં ઘરફોડ ચોરીના બનાવો દિવસે-દિવસે વધી રહયા છે ત્યારે રાંધેજા ગામમાં રહેતા પરિવારના મકાન માંથી ટંકનું તાળું તોડી ગતરોજ દિવસ દરમિયાન અજાણ્યા તસ્કરો સોના-ચાંદીના દાગીના અને રોકડ મળી 95 હજારની ચોરી કરી ફરાર થઈ ગયા હતા. સુત્રો પાસેથી મળતી માહિતી અનુસાર, રાંધેજા ગામમાં રાવળવાસના મકાનમાં રહેતો પરિવાર કામ અર્થે ગયો હતો.તે દરમિયાન ચોરીની ઘટના બનવા પામી છે. જોકે બનાવ અંગે સજનબેન બળદેવભાઈ રાવળે પેથાપુર પોલીસમાં ફરિયાદ નોંધાવી હતી કે, ગતરોજ સવારના સમયે તેમના પતિ ગામમાં ઘંટીએ ગયા હતા અને તેઓ ઘાસચારો લેવા માટે ખેતરમાં ગયા હતા. ત્યારબાદ સાંજે પરત ફર્યા હતા અને રાત્રે 9 વાગ્યે ઘરમાં જઈ તપાસ કરતાં રાખેલા ટંકનો નકુચો તુટેલો હતો. જેમાં મુકેલા રોકડા 35 હજાર તેમજ સોના-ચાંદીના દાગીના મળી 95 હજારની ચોરાઈ ગયા હતા. બનાવ અંગે પેથાપુર પોલીસે ગુનો દાખલ કરીને વધુ તપાસ શરૂ કરી હતી.