મનિષા એસ. સુર્યવંશી/તાપી : વ્યારાના ચીખલદા ગામની ડેરી સામેથી પસાર થતાં વ્યારાથી ભેંસકાતરી જતાં રોડ ઉપર બુલેટ બાઈક અડફેટે આવતાં દૂધ ભરવા ગયેલ રાહદારીનું ગંભીર ઈજાને કારણે મોત નિપજ્યું હતું. બનાવ અંગે પોલીસે કાર્યવાહી હાથ ધરી હતી. મળતી માહિતી મુજબ, વ્યારાના ચીખલદા ગામના મોટું ફળિયુંમાં રહેતા સોમાભાઈ પાતળીયાભાઈ ગામીત (ઉ.વ.65)નાઓ ગત તારીખ 21/11/2023નાં રોજ મોડી સાંજે ગામની ડેરીમાં દૂધ ભરીને પરત તેમના ઘરે જતા હતા.

તે સમયે ડેરીની સામેના રોડ પાસેથી તેમની સાયકલ પકડીને પગપાળા જતા હતા તે દરમિયાન એક બુલેટ બાઈક નંબર GJ/21/BN/8883નો ચાલક વિરલભાઈ વિનોદભાઈ ગામીત (રહે.ઝાંખરી ગામ, તા.વ્યારા) નાંએ પોતાના કબ્જાની બુલેટ બાઈક પુરઝડપે અને ગફલતભરી રીતે હંકારી લાવી પાછળથી અડફેટમાં લઈ અકસ્માત સર્જ્યો હતો. જોકે આ અકસ્માતમાં સોમાભાઈને માથાના પાછળનાં ભાગે ગંભીર ઈજા તથા ડાબા પગમાં ઘૂંટણમાં તેમજ જમણા પગમાં ઘૂંટણનાં ભાગે તથા એડીના ભાગે ગંભીર ઈજાઓ પહોંચતા લાંબી સારવાર દરમિયાન મોત નિપજ્યું હતું. બનાવ અંગે કલ્પેશભાઈ ગામીત નાએ વ્યારા પોલીસ મથકે તારીખ 28/12/2023નાં રોજ બુલેટ બાઈક ચાલક વિરલ ગામીત વિરુદ્ધ ગુનો નોંધાવતા વ્યારા પોલીસે આગળની વધુ કાર્યવાહી હાથ ધરી હતી.