વલસાડ જિલ્લાનાં ઉમરગામનાં ડેહલી ગામે હોટલ સામેથી પસાર થતાં રાહદારીનું કાર અડફેટે મોત નિપજ્યું હતુ. મળતી માહિતી મુજબ, ઉમરગામ તાલુકાનાં ડેહલી ગામ કાદરી હોટલની સામે અશોકભાઈ મંગલભાઈ પટેલ (ઉ.વ.૪૩, મૂળ રહે.મધ્યપ્રદેશ) અને રવીન્દ્રકુમાર કનૈયાલાલ પટેલ હોટલમાં જમવા ગયા હતા. હોટલમાં જમીને રોડ ક્રોસ કરી પોતાના કન્ટેનર પાસે આવતાં સમયે મુંબઈથી વાપી તરફ જતી એક સફેદ કલરની કારનાં ચાલકે પોતાની કાર પૂરઝડપે હંકારી લાવી અશોકભાઈને ટક્કર મારી હતી.

આ અકસ્માતમાં અશોકભાઈને માથાનાં તથા નાકનાં ભાગે ગંભીર ઈજા પહોંચી હતી. ત્યારબાદ રાહદારીઓ અને વાહન ચાલકોએ દોડી આવી અશોકભાઈને ૧૦૮ બોલાવી સૌપ્રથમ સારવાર માટે ભીલાડ હોસ્પિટલ ખાતે લઈ જવાયા હતા. ત્યાંથી વધુ સારવાર માટે વાપીની ખાનગી હોસ્પિટલમાં દાખલ કરાયા હતા. જ્યાં સારવાર દરમિયાન રાત્રીના અરસામાં અશોકભાઈનું મોત નિપજ્યું હતું.