પલસાણાનાં કરાળા ગામેથી ગાંગપુર ગામે મિત્રના લગ્નમાં ડીજેના પ્રોગ્રામમાં નાચી મોડી રાતે મોટરસાયકલ પર પોતાના ઘરે પરત ફરી રહેલા મિત્રોને ઘર નજીક જ અકસ્માત નડતા એક મિત્રનું સારવાર દરમિયાન મોત નીપજ્યું હતું. સુત્રો પાસેથી મળતી માહિતી અનુસાર, પલસાણાનાં કરાળા ગામે ખાડી ફળિયામાં રહેતા કરણ શંકરભાઈ રાઠોડ (ઉ.વ.22) અને બાજુમાં રહેતો તેનો મિત્ર અક્ષય રમેશભાઇ રાઠોડ (ઉ.વ.19) સાથે બુધવારે મોડી રાતે પલસાણાના ગાંગપુર ગામે મિત્રના લગ્નમાં મોટરસાયકલ GJ/19/AG/3472 લઇ નાચવા માટે ગયા હતા.

જોકે, મોડી રાતે ઘરે પરત ફરતી વખતે કરણ ગામની હદમાં બસ સ્ટેન્ડ સામેના કટ પર મુંબઈથી અમદાવાદ તરફ જતા ટ્રક નંબર HR/74/B/9759ના ચાલકે અડફતે લેતા મોટરસાયકલ સવાર બને મિત્ર ગંભીર રીતે ઘવાયા હતા બંને મિત્રોને મોડી રાતે 108 મારફતે રાહદારીઓએ સારવાર હેઠળ સુરત સ્મીમેર હોસ્પિટલમાં ખસેવામાં આવ્યા હતા. જ્યાં ગુરુવારે વહેલી સવારે કરણ રાઠોડનું મોત નીપજ્યું હતું. તેમજ અક્ષય રાઠોડને હાથમાં ફ્રેક્ચર હોવાનું જણાય આવ્યું હતું. ઘટના અંગે મૃતકમાં મોટા ભાઈ અર્જુન રાઠોડે પલસાણા પોલીસ મથકમાં ફરિયાદ આપી હતી.