ગાંધીનગરનાં  કલોલ પાસેનાં રાચરડા ગામે બુલેટ અને બાઈક વચ્ચે અકસ્માત સર્જાયો હતો જેમાં બુલેટ ચાલક યુવકને માથાના ભાગે ઇજાઓ પહોંચતા તેનું મોત નિપજ્યું હતું. બનાવ અંગે પોલીસે બાઈક ચાલક સામે ગુનો દાખલ કરી તપાસ ચલાવી હતી. મળતી માહિતી મુજબ, કલોલ પાસેનાં નાસમેદ ગામે રહેતા ભાવેશ મુકેશજી ઠાકોર અને વિશાલ ઠાકોર બુલેટ લઈને રાચરડા પાટીયા પાસેથી પસાર થઈ રહ્યા હતા ત્યારે વળાંકમાં અચાનક બાઈક આવી જતા બુલેટ બાઈક સાથે ભટકાયું હતું. આ અકસ્માતમાં બુલેટ ઉપર સવાર બંને યુવકો અને બાઈક ઉપર સવાર બંને યુવકો નીચે પડી ગયા હતા. જેમાં વિશાલને માથાના  ભાગે ઇજાઓ પહોંચતા તેનું મોત નીપજ્યું હતું. અકસ્માતમાં બાઈક સવાર યુવકોને પણ ઇજાઓ પહોંચી હોવાથી તેમને સારવાર માટે હોસ્પિટલમાં ખસેડવામાં આવ્યા હતા. અકસ્માત અંગે પોલીસે મુકેશજી ખોડાજી ઠાકોરની ફરિયાદના આધારે ચાલક સામે ગુનો દાખલ કરી તપાસ હાથ ધરી હતી.