નવસારી ટાઉન વિસ્તારમાં ૧૪ વર્ષ પહેલા સન ૨૦૧૦ના વર્ષમાં બ્યૂટીપાર્લરના કામ માટે આવી મહિલાની ફેસિયલ મસાજ કરવાના બહાને આંખો ઉપર રૂના પૂમડાં મૂકી સોનાના દાગીનાની ચોરી કરનાર મહિલાની એસ.ઓ.જી. પોલીસે સુરતમાંથી ધરપકડ કરી હતી.

સુત્રો પાસેથી મળતી માહિતી મુજબ, સન ૨૦૧૦ના વર્ષમાં નવસારી ટાઉન વિસ્તારમાં રહેતી એક મહિલાએ તેની બહેનના લગ્ન પ્રસંગ આવનાર હોવાથી ૧૦ દિવસ પહેલા બ્યૂટી પાર્લર કામ કરતી નિલમ પટેલ (રહે.ખારા અબ્રામા, તા.જલાલપોર, નવસારી)ને ઘરે બોલાવી હતી. જોકે નિલમ પટેલે તેને બોલાવનાર મહિલાનું ફેસિયલ મસાજ કરવાના બહાને ચહેરા પર ક્રીમ લગાવી અને આંખો ઉપર રૂના પૂમડાં મૂકી દાગીના ખરાબ થઈ જશે તેમ કહીં ઉતરાવેલા સોનાનું મંગળસૂત્ર અને સોનાની બુટ્ટી મળી પોણા ચાર તોલા સોનાના દાગીના લઈ ફરાર થઈ ગઈ હતી.

થોડીવાર બાદ ફેસિયલ કરાવનાર મહિલાએ આંખો ખોલતા નિલમ પટેલ નહીં દેખાતા ચોરી થયાનો અહેસાસ થતા ટાઉન પોલીસ સ્ટેશને ફરિયાદ નોંધાવી હતી. હાલમાં નવસારી પોલીસ દ્વારા નોંધાયેલા ગુનાના વોન્ટેડ આરોપીઓને પકડાવા માટેની ડ્રાઈવ ચલાવામાં આવી રહી છે. જે અંતર્ગત નવસારી એસઓજીના પીઆઈ એન.એમ.આહીરના માર્ગદર્શન હેઠળ પીએસઆઈ પી.વાય. ચિત્તેની ટીમે ટેફનિકલ સર્વેલન્સના આધારે ટાઉન પોલીસ સ્ટેશન મથકમાં નોંધાયેલા ગુનાની તપાસ હાથ ધરી મહિલાના સોનાના દાગીના તફડાવી ફરાર થઇ જનાર નિલમ રમેશ પટેલ (મૂળ રહે.ખારા અબ્રામા, તા.જલાલપોર, નવસારી, હાલ રહે.સ્ટાર ગાર્ડન રેસિડન્સી, વરિયાવાડ, ન્યૂ કતતારગામ, સુરત)ને ઝડપી પાડી હતી. એસ.ઓ.જી.ની પ્રાથમિક પૂછપરછમાં નિલમ પટેલે ચોરી કરેલા દાગીના જે તે સમયે અમલસાડના ઝવેરીને વેચી દીધા હોવાની કબૂલાત કરી હતી. બનાવ અંગે વધુ તપાસ નવસારી ટાઉન પોલીસ કરી રહી હતી.