નવસારી જિલ્લામાં પ્રવાસીઓ માટે જે સ્થળો છે તેમાં 2 બીચ પણ છે. એક દાંડી અને બીજો ઉભરાટ છે. આ બંને બીચ ઉપર દક્ષિણ ગુજરાતના લોકોનો રજાના દિવસોએ ભારે ધસારો રહે છે. જોકે, કોરોનાએ આ બંને બીચો પરના ટુરિઝમ ઉપર પણ વિપરીત અસર કરી છે. માર્ચ 2020થી મહત્તમ સમય આ બીચો બંધ જ રહ્યા છે. પહેલી લહેર શાંત થયા બાદ થોડો સમય બીચ ખુલ્યા હતા, જે બાદમાં બંધ થયા હતા. બીજી લહેર શાંત થતા જાહેર રજાના દિવસો સિવાય ખોલવાની મંજૂરી કેટલાક સમયથી અપાઈ હતી. રજાના દિવસોએ જ વધુ પ્રવાસી આવતા હોય કોઈ ફાયદો પર્યટકો અને ધંધાર્થીઓને થયો ન હતો. જેથી રજાના દિવસોએ પણ બીચ ખોલવાની માંગ થઈ રહી હતી. આ અંગે ધારાસભ્ય, ઉભરાટના સરપંચ વગેરેએ તંત્રના ધ્યાન ઉપર વાત લાવી હતી. અંતે તંત્ર એ નવો હુકમ કર્યો હતો અને આ હુકમમાં ઉભરાટ બીચ કોવિડ ગાઈડ લાઈનની શરતને ધ્યાને લઇ અઠવાડિયાના તમામ દિવસ સવારે 9 થી સાંજે 6 સુધી ખુલ્લો રાખવા મંજૂરી આપી છે. જેથી આગામી તા.17મીને રવિવારથી બીચ ખુલશે અને સહેલાણીઓ બીચ ઉપર આવી આનંદ માણી શકશે.