નવસારી એસ.એસ.અગ્રવાલ હાઈસ્કૂલમાં અભ્યાસ કરી ગુરૂવાર સાંજે મોપેડ ઉપર પરત ફરતા કછોલીનાં બે વિદ્યાર્થીઓને કોલવા ગામે સામેથી આવતા ટેમ્પોએ અડફેટે લેતા એકનું કરુણ મોત નિપજયું હતું. જયારે બીજો ગંભીર રીતે ઘવાયો હતો. અકસ્માત અંગે ગણદેવી પોલીસે ગુનો નોંધી તપાસ હાથ ધરી હતી.

સુત્રો પાસેથી મળતી માહિતી મુજબ, ગણદેવી તાલુકાનાં કછોલી ગાનાં ડુંગરી ફળિયામાં રહેતો ગૌરવ મહેશભાઈ પટેલ અને કાશી ફળિયામાં રહેતો તીર્થ જીગ્નેશભાઈ નાયક ગુરુવારે નવસારીની એસ. એસ.અગ્રવાલ હાઈસ્કૂલમાં ધો.12 સાયન્સનાં એકસ્ટ્રા કલાસીસ ભરવા ગયા હતા. જયાંથી એક્ટિવા મોપેડ નંબર GJ/21/BG/0284 ઉપર ઘરે પરત ફરતા હતા. તે સમયે સાંજે કોલવા સાલેજ રોડ ઉપર દલાલ ફાર્મ પાસેનાં વળાંકમાં સામેથી પુરપાટ ઝડપે આવતા ટાટા ટેમ્પો નંબર GJ/26/T/2299ને કારણે મોપેડને બ્રેક મારતા સ્લીપ થઈ હતી.

તે સમયે ટેમ્પાનું પાછલું વ્હીલ ફરી વળતા ગૌરવનાં માથા, હાથ, પગમાં જીવલેણ ઇજા પહોંચતા મોત નિપજ્યું હતું. જ્યારે મોપેડ ચાલક તીર્થ નાયક મોપેડ સાથે ઘસડાતો રોડ સાઈડે પટકાયો હતો. જેમાં ઇજા પહોંચી હતી. મૃતક ગૌરવને કછોલી પ્રા.આરોગ્ય કેન્દ્ર લઈ જવાયો હતો. જયારે ટેમ્પો ચાલક જીગ્નેશ ભૂપેન્દ્રભાઈ પટેલા (રહે.સ્ટેશન રોડ, અમલસાડ તા. ગણદેવી) હોવાની ઓળખ થઈ હતી. અકસ્માત અંગે ગણદેવી PSI વિજય પટેલ આગળની વધુ તપાસ હાથ ધરી હતી.