નવસારીમાં નેશનલ હાઈવે નંબર-48 પર ચીખલીના મજીગામ દિનકરભવન નજીક અજાણ્યા વાહનની અડફેટે દીપડાનું મોત થયું હતું. નવસારી જિલ્લાના પૂર્વ પટ્ટીના ગામોમાં દીપડો દેખાવાના બનાવો વધ્યા છે. જેને લઈને ખેડૂતોમાં ભય જોવા મળી રહ્યો છે. આમ તો આ વિસ્તારમાં દીપડો અવાર-નવાર દેખાતો જ હોય છે અને ખેડૂતો અને દીપડાઓનો ક્યારેક સામનો પણ થાય છે. ત્યારે રાત્રીના સમયે દીપડો રોડ ક્રોસ કરતી વખતે વાહનની અડફેટે આવતા તેનું મોત થયુ હતું. બનાવ અંગે વન વિભાગે દીપડાનો કબ્જો લઈને તપાસ હાથ ધરી હતી.

જોકે, અગાઉ પણ દીપડાના અકસ્માતે મોત થઈ ચૂક્યાં છે. પૂર્વ પટ્ટીના ગામોમાં દીપડો દેખાયો હોવા અંગે વન વિભાગને અવાર-નવાર જાણ કરવામાં આવે છે. દીપડાઓ પાંજરે વહેલા પુરાતાં નથી અને રાત્રીને સમયે દીપડાઓ કૂતરા કે મરઘાં અને બકરાનો શિકાર કરી જાય તેવા અનેક બનાવો સામે આવ્યાં છે.