નવી સિવિલ હોસ્પિટલ સ્થિત કિડની બિલ્ડિંગ ખાતે 'ધી ટ્રેઈન્ડ નર્સિસ એસોસિએશન ઓફ ઇન્ડિયા, સુરત દ્વારા 'રાષ્ટ્રીય ડોક્ટર દિવસ'ની ઉત્સાહભેર ઉજવણી કરવામાં આવી હતી. શાંતિના પ્રતિક સમા ફુગ્ગાઓ ઉડાડી, કેક કાપી, તબીબોને સાલ ઓઢાડી નર્સિંગ બહેનોએ ડોક્ટર દિવસની ઉજવણી કરી હતી. આ પ્રસંગે નર્સિંગ કાઉન્સિલના ઇકબાલ કડીવાલાએ જણાવ્યું હતુ કે, બાળકના જન્મ પૂર્વે તેમજ જન્મ બાદ આજીવન તેઓના સુખમય સ્વાસ્થ્યની તકેદારી લેતા જીવન રક્ષક-તબીબોની સેવા અને સમર્પણને બિરદાવવા ‘રાષ્ટ્રીય ડોક્ટર દિવસ’ની ઉજવણી કરવામાં આવે છે. સફેદ એપ્રન માનવી માનવજીવન માટે આશીર્વાદ સમાન છે અને તેની પ્રતીતિ સમગ્ર વિશ્વને કોરોના મહામારી દરમિયાન ખુબ સારી રીતે થઈ ચૂકી છે.

વધુમાં તેમણે કહ્યું કે, દક્ષિણ ગુજરાતની સૌથી મોટી નવી સિવિલ હોસ્પિટલ દ્વારા લોકોના આરોગ્યની ખેવના રાખવામાં કોઈ કસર છોડવામાં આવતી નથી. તેમજ તબીબો સાથે નર્સિંગ સ્ટાફ દ્વારા જરૂરિયાતમંદ તમામ લોકોને નિઃશુલ્ક આરોગ્યલક્ષી સેવા પ્રદાન થતી હોવાનું પણ તેમણે જણાવ્યું હતું. દર્દી અને ડોક્ટર વચ્ચેની પરસ્પર આત્મિયતાની વાત કરતા તેમણે કહ્યુ કે, ડોકટરનું એક સ્મિત દર્દી માટે દવાથી વધારે અસરકારક સાબિત થાય છે. વધુમાં કડીવાલાએ કોરોના મહામારી, રેલ કે પ્લેગ જેવી આફતના સમયે ખડેપગે રહી માનવજીવનને સંકટમાંથી ઉગારતા તબીબોની સેવાને બિરદાવી હતી. સાથે જ આરોગ્ય ક્ષેત્રે સિક્કાની એક તરફ ડૉક્ટર તો બીજી તરફ નર્સને ગણાવી તેમણે તબીબી સેવાઓમાં નર્સની મહત્વની ભૂમિકા વિષે વાત કરી હતી. તેમણે કહ્યું કે, બિમારી સાથે આવનાર દર્દીઓને ડોકટરો પારિવારીક સભ્યોની જેમ હૂંફ આપી સારવાર કરી દર્દીઓને સારુ સ્વાસ્થ્ય અર્પણ કરે છે.