ડેડિયાપાડાથી મોવી જતા સ્ટેટ હાઇવે ઉપર કાર અને બાઈક વચ્ચે અકસ્માત થતા બાઈક પર સવાર એકનું ઘટના સ્થળે કરુણ મોત નીપજ્યું હતું. બનાવની વિગત એવી છે કે, ફોર ગાડીનાં ચાલકે પોતાની ગાડી ગફલતભરી રીતે હંકારી લાવી ડેડીયાપાડાથી મોવી સ્ટેટ હાઇવે ઉપર પનગામની સીમમાં આવેલી વૈદેહી આશ્રમ શાળાથી આગળ પનગામના બસ સ્ટેશન પાસે વળાંકમાં મોવી તરફથી આવી રહ્યા હતા.

તે સમયે બાઇકનાં ચાલક ધર્મેન્દ્ર મનુ વસાવા (રહે. મોસીટ. નિશાળ ફળિયું, તા.ડેડીયાપાડા) તેમજ પાછળ બેઠેલા તેમના પત્ની સુરેખાબેન તેમજ દીકરી હિનાબેનને સામેથી અથાડી દેતા બાઈક ચાલક ધર્મેન્દ્ર વસાવાનું ઘટના સ્થળે મોત નીપજ્યું હતું. જયારે તેમની પત્ની સુરેખાબેન અને દીકરી હિનાબેનને હાથ પગે ફેક્ચર તેમજ અન્ય નાની મોટી ઇજાઓ થઈ હતી. જોકે, અકસ્માતને પગલે કાર ચાલક કાર મૂકી ફરાર થઈ ગયો હતો. બનાવ અંગે પોલીસ અકસ્માત મોતનો ગુનો નોંધી તપાસ કરી રહી હતી.