ઐતિહાસિક સાયન કિલ્લા પર 50 ફૂટ લાંબો રાષ્ટ્રધ્વજ ફરકતો કરવાનું નિયોજન પુરાતત્વ વિભાગ કરી રહ્યું છે. તેમના પ્રસ્તાવને પરવાનગી પણ મળી ગઈ છે. મુંબઈમાં રહેલાં કિલ્લાઓ પરનો આ સૌથી મોટો રાષ્ટ્રધ્વજ હશે. આ બાબતે છેલ્લાં ઘણા સમયથી અધિકારીઓ અને નાગરિકો દ્વારા માગણી થઈ રહી હતી. જેને હવે મંજૂરી મળી ગઈ છે. સાયન કિલ્લો ભારતીય પુરાતત્વ વિભાગના અંતર્ગત છે. મુંબઈનો આ સૌથી ઊંચો કિલ્લો હોઈ તેની સમુદ્ર સપાટીથી ઊંચાઈ 160 ફૂટની છે.

કિલ્લા પરના પંડિત જવાહરલાલ નહેરુ ઉદ્યાનમાં નવો ઝંડો પ્રસ્થાપિત કરાશે. અત્યારે આ ગાર્ડનમાં 30 ફૂટ ઊંચો રાષ્ટ્રધ્વજ છે. નવા ધ્વજનો થાંભલો 50 ફૂટ (15 મીટર) ઊંચો હશે. તેના પરના રાષ્ટ્રધ્વજની લંબાઈ 12 તેમજ પહોળાઈ 8 ફૂટની રહેશે. આ ધ્વજ 365 દિવસ ફરકતો રહેશે.

ઝંડાના થાંભલા માટે વિશેષ લાઈટ્સની પણ વ્યવસ્થા કરાશે. આ પરિસરમાં ચાર ફોકસ પણ લગાડવામાં આવશે. ઝંડો ઊભો કરવા અહીં મજબૂત ચબૂતરો બનાવાશે. તે માટે જમીનમાં આઠ બાય આઠ પહોળો અને છ ફૂટ ઊંડો ખાડો ખોદવો પડશે. ટૂંક સમયમાં અહીં ભવ્ય તિરંગો ફરકતો જોઈ શકાશે, એવી માહિતી પુરાતત્વ વિભાગના અધિકારીએ આપી છે.