દાનહ સેલવાસની વિનોબાભાવે સિવિલ હોસ્પિટલમાં નવજાત બાળકને બાથરૂમમાં મુકી માતા ફરાર થઇ ગઈ હતી. ઘટનાની જાણ થતા હોસ્પિટલમાં દોડધામ મચી જવા પામી હતી. જોકે આ નવજાત શિશુનું સારવાર દરમિયાન ગણતરીનાં કલાકોમાં જ મોત નીપજ્યું હતું. દાનહ સેલવાસની વિનોબાભાવે સિવિલ હોસ્પિટલમાં બુધવારે એક મહિલાએ નવજાત બાળકને જન્મ આપ્યો હતો. જોકે આ મહિલાએ કોઇ અગમ્ય કારણસર પોતાના નવજાત બાળકને હોસ્પિટલના બાથરૂમમાં ત્યજી દઇ ફરાર થઇ ગઈ હતી.

જોકે હોસ્પિટલનાં સ્ટાફે જ્યારે નવજાત બાળકને બાથરૂમમાં જોતા તાત્કાલિક ડોક્ટર અને સ્ટાફને જાણ કરતા દોડધામ મચી ગઇ હતી. ઘટનાની જાણ પોલીસને કરવામાં આવતા પોલીસ પણ હોસ્પિટલ ધસી આવી હતી. આ નવજાત બાળકનું બુધવારનાં રોજ સારવાર દરમિયાન મોત થયું હતું. ઘટના અંગે પોલીસે ફરિયાદ નોંધી CCTV ફૂટેજનાં આધારે અને હોસ્પિટલનાં રેકર્ડનાં આધારે નવજાત બાળકનાં માતા-પિતાની શોધખોળ શરૂ કરી હતી.