તાપી સહીત રાજ્યમાં અત્યારે વાતાવરણમાં અચાનક પલટો આવ્યો છે. મોટાભાગના વિસ્તારોમાં શિયાળામાં ચોમાસા જેવો માહોલ સર્જાયો છે. ઠેકઠેકાણે કડાકા ભડાકા સાથે કમોસમી વરસાદ નોંધાયો છે,જ્યારે તાપી જિલ્લાના કેટલાક વિસ્તારોમાં કરા પડ્યાના દ્રશ્યો પણ જોવા મળ્યા હતા.ઉચ્છલમાં કરા સાથે વરસાદ પડ્યો છે તો સોનગઢમાં વીજપોલ અને વૃક્ષ ધરાસાયી થયા હતા.

છેલ્લા ૨૪ કલાકના એટલે કે તા.૨૬મી નવેમ્બર સવારે ૬ વાગ્યેથી તા.૨૭મી નવેમ્બર સવારે ૬ વાગ્યા સુધીમાં વરસાદી આંકડા પર નજર કરવામાં આવે તો તાપી જિલ્લાના સાતેય તાલુકામાં હળવેથી ભારે કમોસમી વરસાદ પડ્યો છે,જેમાં સૌથી વધુ કુકરમુંડામાં અને નિઝરમાં નોંધાયો છે.આ દરમિયાન આકાશી વિજળી પડવાના કારણે સોનગઢ તાલુકામાં બે જુદાજુદા બનાવોમાં બે વ્યક્તિઓના મોત નિપજ્યા છે.છેલ્લા ૨૪ કલાક દરમિયાન સાતેય તાલુકામાં કમોસમી વરસાદ નોંધાયો છે,તાપી જિલ્લાના કુકરમુંડામાં ૪ ઇંચ, નિઝરમાં ૩ ઇંચ, ઉચ્છલમાં ૧ ઇંચ , સોનગઢમાં ૨ ઇંચ , વ્યારા અને વાલોડ અને ડોલવણમાં દોઢ-દોઢ ઇંચ વરસાદ પડ્યો છે.