સુરત જિલ્લાના ઓલપાડ તાલુકાની દરિયાઈ કાંઠા પટ્ટીના મોર ગામના સુરેશભાઈ પટેલ બાઈક હંકારી જઈ રહ્યા હતા ત્યારે મિરઝાપુર પાટિયા પાસે રોડના વળાંકમાં તેમની બાઈકને એક એસ.ટી. બસે અડફેટે લેતા સર્જાયેલા ગંભીર ઈજા પામેલા સુરેશભાઈનું મોત નિપજ્યું હતુ.

બનાવ અંગે મૃતકના પુત્ર હિતેશભાઈ પટેલે ઓલપાડ ફરિયાદ નોંધાવી હતી. મળતી વિગતો મુજબ, મોર ગામે પોપડી ફળિયામાં રહી સુરેશભાઈ નારણભાઈ પટેલ (ઉ.વ.૬૧) વેપાર કરતા હતા. તેઓ ગત શનિવાર સવારે પોતાની બાઈક નંબર જીજે/૦૫/એફએક્સ/૦૨૭૭ હંકારી પોતાના ગામ જઈ રહ્યા હતા.

તે સમયે મિરઝાપુર પાસે રોડ ઉપર દોડતી એસ.ટી. નિગમની સરકારી બસ નંબર જીજે/૧૮/ઝેડ/૫૩૯૬ના અજાણ્યા ડ્રાઈવરે તેની બસ ગફલતભરી હંકારી સામેથી આવતી સુરેશભાઈની બાઈકને મિરઝાપુર પાટિયાના વળાંકમાં અડફેટે લીધી હતી. આ અકસ્માતમાં સુરેશભાઈને જમણા હાથમાં તથા માથાના ભાગે ગંભીર ઈજા થતા તેમને ઓલપાડ ખાતેની એક બાદ વધુ સારવાર અર્થે ઓલપાડના સામૂહિક આરોગ્ય કેન્દ્રમાં લઈ જવાયા હતાં. જ્યાં ફરજ પરના તબીબે સુરેશભાઈને તપાસી મૃત જાહેર કર્યા હતા. આ બાબતે મૃતકના પુત્ર હિતેશભાઈ પટેલે ઓલપાડ પોલીસ મથકમાં એસ.ટી.બસના અજાણ્યા ડ્રાઈવર વિરુદ્ધ પોલીસ ફરિયાદ નોંધાવી હતી.