ડાંગના સાપુતારામાં એક બંગલામાં મોડી રાત્રે દીપડો ઘુસી આવ્યો હતો અને તેણે શ્વાન પર હુમલો કર્યો હતો. જોકે આ સમગ્ર ઘટના બંગલાના સીસીટીવીમાં કેદ થઈ ગઈ હતી.રહેણાંક વિસ્તારમાં દીપડો ઘુસી આવતા સ્થાનિકોમાં ભયનો માહોલ જોવા મળી રહ્યો છે.

સાપુતારાના સાંઈ લિલા બંગલોમાં મોડી રાત્રીએ શિકારની શોધમાં દીપડો ઘુસી આવ્યો હતો. જો કે, બંગલાના પાર્કિંગમાં એક શ્વાન સૂતો હતો. એટલામાં ધીમે ધીમે દીપડો તેની નજીક જાય છે અને શ્વાન પર હુમલો કરી દે છે. આ અચાનક થયેલા હુમલાનો શ્વાન વળતો જવાબ આપે છે અને દીપડાના પંજામાંથી છૂટી જાય છે. દીપડો શિકાર કરવા શ્વાન પર ફરી હુમલો કરવાનો પ્રયત્ન કરે છે.

પરંતુ એટલામાં જ અવાજ સાંભળીને બંગલાના માલિક ઘરના દરવાજા પાસે આવી પહોંચ્યા. બંગલાના માલિકના આવી જતા દીપડો ત્યાંથી ભાગી જાય છે. જેના કારણે શ્વાનનો આબાદ બચાવ થયો. ત્યારે આ સમગ્ર ઘટના સીસીટીવી કેમેરામાં કેદ થઈ ગઈ હતી. રહેણાંક વિસ્તારમાં દીપડો ઘુસી આવતા સ્થાનિકોમાં ભયનો માહોલ જોવા મળ્યો. તો બીજીતરફ સ્થાનિક રહીશો દ્વારા આ અંગે વન વિભાગને જાણ કરવામાં આવી હતી.