સુરતનાં કામરેજ તાલુકાનાં અબ્રામા ખાતે કન્સ્ટ્રક્શન સાઈટનાં પાંચમાં માળે કામ કરી રહેલો પરપ્રાંતીય મજૂર નીચે પટકાતા તેનું ગંભીર ઇજાથી મોત થયું હતું. હાલ કામરેજના અબ્રામા ગામે લોટસવેલી કન્સ્ટ્રક્શન સાઈડ પર રહી ત્યાં મજૂરી કામ કરતાં મૂળ કટીહાર જિલ્લાના બાલુગંજ ગામ (બિહાર)નાં ૨૭ વર્ષીય મોહમદ આઝમ મોહમદ મુસ્તાકઆલમ શેખ પાંચમા માળે કડિયાકામ કરી રહ્યા હતા. ત્યારે શરીરનું સંતુલન ગુમાવી દેતા પાંચમા માળેથી નીચે પટકાયા હતા. આઝમભાઈને ગંભીર ઈજાઓ પહોંચતા તેમને સારવાર અર્થે નજીકના સારવાર કેન્દ્ર પર ખસેડવામાં આવ્યા હતા. જ્યાં ડોક્ટરોએ આઝમભાઈને મૃત ઘોષિત કર્યા હતા. આ ઘટનાની જાણ થતા કામરેજ પોલીસે અકસ્માત મોતનો ગુનો નોંધી આગળની તપાસ હાથ ધરી હતી.