સોનગઢનાં હીરાવાડી ગામેથી સાદડવેલ રેંજના વન વિભાગનાં સ્ટાફે ખેરનાં લાકડા ભરેલા એક પીકઅપ ટેમ્પાને ઝડપી લીધો હતો. જોકે અંધારાનો લાભ લઇ પીકઅપ ટેમ્પાનો ચાલક ભાગી જવામાં સફળ રહ્યો હતો. સુત્રો પાસેથી મળતી માહિતી મુજબ, સાદડવેલ રેંજનાં આર.એફ.ઓ., સી.કે.આજરા અને સ્ટાફને બાતમી મળી હતી કે, હીરાવાડીનાં મુખ્ય રોડ પરથી ખેરના લાકડા ભરેલ એક પીકઅપ ટેમ્પો પસાર થનાર છે.

જે બાતમીનાં આધારે સાદડવેલ રેંજના સ્ટાફે બુધવારનાં રોજ રાત્રિનાં 10 વાગ્યાના અરસામાં હિરાવાડીમાં વોચ ગોઠવી હતી. તે સમયે પુરઝડપે પસાર થતા લાકડા ભરેલો પીકઅપ ટેમ્પોને રોકવા પ્રયાસ કર્યો હતો. પરંતુ ચાલકે પૂરઝડપે ભગાવતા વન વિભાગના સ્ટાફે તેનો ટોકરવા અને ત્યાંથી ઝરાલી રોડ પર પીછો કરતા પીકઅપ ટેમ્પાનો ચાલક અંદરના ગ્રામ્ય રસ્તે ફરી હીરાવાડી તરફ ભાગ્યો હતો.

જયારે પાછળ વન વિભાગે વાહનને પીછો કરતા જોઇ પીકઅપ ટેમ્પાનો ચાલક હીરાવાડી નજીક એક રીંગણના ખેતરમાં પીકઅપ ટેમ્પો ઉતારી અંધારામાં ભાગી છુટયો હતો. વન વિભાગના સ્ટાફે ટેમ્પો નંબર MH/12/SF/4783માંથી રૂપિયા 40 હજારની કિંમતના ખેરના લાકડા અને રૂપિયા 2.50 લાખની કિંમતનો પીકઅપ ટેમ્પો મળી કુલ્લ રૂપિયા 2.90 લાખનો મુદ્દામાલ કબ્જે લીધો હતો. વન વિભાષે ભાગી છુટેલા અજાણ્યા ચાલક સામે ગુનો નોંધી વધુ તપાસ હાથ ધરી હતી.(ફાઈલ ફોટો)