સ્થાનિક બજારમાં કિંમતોમાં ઘટાડાને ધ્યાનમાં રાખીને કેન્દ્ર સરકાર ડુંગળીની નિકાસ પરનો પ્રતિબંધ હટાવી શકે છે. આ અઠવાડિયે આ સંદર્ભે સમીક્ષા બેઠક યોજાય તેવી શક્યતા છે અને ટૂંક સમયમાં નિર્ણય લેવામાં આવશે. નોંધનીય છે કે, દેશમાં ડુંગળીના ઉત્પાદનમાં ઘટાડો અને ત્રણ મહિનામાં બમણાથી વધુ ભાવવધારા બાદ સરકારે 8 ડિસેમ્બરે ડુંગળીની નિકાસ પર 31 માર્ચ 2024 સુધી પ્રતિબંધ લાદ્યો હતો. રિપોર્ટ અનુસાર છેલ્લા 10 દિવસમાં ખરીફ ડુંગળીની આવક વધી છે. બજારોમાં દરરોજ 15 હજાર ક્વિન્ટલથી વધુની આવક ચાલુ છે.

આવકમાં વધારાને કારણે ડુંગળીની કિંમત 1870 રૂપિયા પ્રતિ ક્વિન્ટલથી લગભગ 20 ટકા ઘટીને 1500 રૂપિયા પ્રતિ ક્વિન્ટલ થઈ ગઈ છે. ગયા મહિનાની સરખામણીએ કિંમતોમાં લગભગ 35 ટકાનો ઘટાડો થયો છે અને તેના કારણે સ્થાનિક બજારમાં પણ ભાવ ઘટવા લાગ્યા છે. આ સ્થિતિને જોતા સરકાર પ્રતિબંધના નિર્ણયની સમીક્ષા કરશે અને સંભવિત છે કે સહકારી માધ્યમો દ્વારા નિકાસને મંજૂરી મળી શકે છે. 1 જાન્યુઆરી, 2024ના રોજ સમગ્ર દેશમાં ડુંગળીની સરેરાશ કિંમત 39.50 રૂપિયા હતી અને મોડેલની કિંમત 30 રૂપિયા હતી. અધિકારીઓના જણાવ્યા અનુસાર ભાવમાં ઘટાડા છતાં સરકાર સ્થાનિક બજારમાં રાહત દરે વેચાણ ચાલુ રાખશે. ઉપરાંત એસીસીએફ, નાફેડ સહિત અન્ય સહકારી સંસ્થાઓ પાસેથી પણ ખરીદી ચાલુ છે. અત્યાર સુધી સરકારે 25 હજાર ટનની ખરીદી કરીને સ્થાનિક બજારમાં ઉપલબ્ધતા સુનિશ્ચિત કરી છે.