રાજયના છેવાડે આવેલા વનાચ્છાદિત ડાંગ જિલ્લાનાં તા.10થી 20 જાન્યુઆરી દરમિયાન ચાલનારા ‘કરૂણા અભિયાન'ને અસરકારક બનાવી મૂંગા પશુ-પક્ષીઓના જીવન બચાવામાં સૌને પરસ્પર સંકલન સાથે કામગીરી હાથ ધરવાની ડાંગ કલેક્ટર ધર્મેન્દ્રસિંહ જાડેજાએ હિમાયત કરી છે. પ્રતિવર્ષ ઉત્તરાયણના તહેવારો સાથે યોજાતા 'કરૂણા અભિયાન'દરમિયાન ઘાયલ પશુ-પક્ષીઓની સારવાર અને સુશ્રુષા ઉપર રાજય સરકાર દ્વારા વિશેષ લક્ષ કેન્દ્રિત કરીને ‘જીવદયા'ની ભાવના જગાવવામા આવે છે.

આ વર્ષે પણ તા.10થી 20 જાન્યુઆરી દરમિયાન ‘કરૂણા અભિયાન'નાં ભાગરૂપે ડાંગ જિલ્લાનાં ત્રણેય તાલુકા આહવા, વઘઇ અને સુબીરમાં ઘાયલ પશુ-પક્ષીઓની સારવાર સાથે વિશેષ ટીમની રચના કરી કામગીરી હાથ ધરવામાં આવશે. આહવા તાલુકામાં પશુ દવાખાનુ-આહવા સંપર્ક નંબર 97249 86604, 94088 06614, વઘઈ તાલુકા માટે પશુ દવાખાનું વઘઇ સંપર્ક નંબર 97268 50248, 94272 38513 તથા સુબીર તાલુકા માટે પશુ દવાખાનુ-સુબીર સંપર્ક નંબર 82008 55988, 94265 01366 જાહેર કરાયા છે. આ નંબરો ઉપર જિલ્લાના પ્રજાજાનો ઘાયલ પશુ-પક્ષીઓ વિશેની જાણકારી સવારે 7થી સાંજનાં 6 વાગ્યા સુધી આપી શકે છે.

‘કરૂણા અભિયાન' અંતર્ગત આયોજિત બેઠકને સંબોધતા કલેક્ટરએ ઘાયલ પશુ-પક્ષીઓની સારવાર-સુશ્રુષા માટે સ્થાનિક વન વિભાગના સંકલન સાથે આ અભિયાન અંગે વ્યાપક જનજાગૃતિ કેળવવા અર્થે શિક્ષણ વિભાગના સહયોગ સાથે શાળા કક્ષાએ જનજાગૃતિ કાર્યક્રમો, હોર્ડિંગ્સ-બેનર્સ પ્રદર્શિત કરવા જેવા મુદ્દે ઉપયોગી માર્ગદર્શન પૂરૂં પાડ્યું હતું. આ સાથે જિલ્લામાં ચાઈનીઝ માંજો, પતંગ, તુક્કલ વગેરેના ઉપયોગ ઉપર રોક લગાવવા પોલીસ વિભાગ સઘન કાર્યવાહી કરી રહી છે, જેમા સૌને જાગૃતિ સાથે સહયોગી બનવાની અપીલ કરી હતી.