વલસાડના અબ્રામા સ્થિત ગોકુલધામ સોસાયટીનાં પારદર્શન પ્લોટ નંબર-૧૭૭માં રહેતા નીરજભાઈ ચંદ્રકાંતભાઈ કંબોયા લેબોરેટરીના સાધનોનો વેપાર કરી ગુજરાન ચલાવે છે. તેમનો પુત્ર ઓમકારેશ્વર અમદાવાદમાં ડેન્ગ્યુમાં સપડાતા, નીરજભાઈ તેમની પત્ની સાથે ઘર બંધ કરીને અમદાવાદ ગયા હતા. દરમિયાન આ વિસ્તારમાં ત્રાટકેલા ચોરટાઓએ નીરજભાઈના બંધ મકાનમાં પ્રવેશ કર્યો હતો. ચોરટાઓએ ઘરના કબાટનો સામાન વેરવિખેર કરી નાંખ્યો હતો. ત્યારબાદ ચોરટાઓએ સોનાનું મંગળસૂત્ર, સોનાના બે પાટલા, સોનાની બુટ્ટીનો સેટ, સોનાની બે ચેઈન, ચાંદીનાં સિક્કા અને રોકડા રૂપિયા ૮૦ હજાર મળી કુલ રૂપિયા ૪,૭૬,૪૯૫/-ની ચોરી કરી ફરાર થઈ ગયા હતા.