સિરાજે ઝંઝાવાતી બોલિંગને સહારે એક જ ઓવરમાં ચાર વિકેટ ઝડપીને સનસનાટી મચાવવાની સાથે કુલ 21 રનમાં 6 બેટ્સમેનને પેવેલિયન ભેગા કર્યા હતા. આ સાથે ભારતે એશિયા કપની ફાઈનલમાં શ્રીલંકાને માત્ર 50 રનમાં સમેટી લીધા બાદ 10 વિકેટથી આસાન જીત હાંસલ કરી હતી. આ સાથે ટીમ ઈન્ડિયાએ પાંચ વર્ષમાં પહેલીવાર બહુરાષ્ટ્રીય ટુર્નામેન્ટ જીતવાની સિદ્ધિ હાંસલ કરવાની સાથે રેકોર્ડ આઠમી વખત એશિયા કપ જીતી લીધો હતો. શ્રીલંકા માત્ર 15.2 ઓવરમાં 50 રનમાં જ હારી ગયું હતુ. જવાબમાં ભારતે માત્ર 6.1 ઓવરમાં જ વિના વિકેટે 51 રન કરતાં એશિયા કપ જીતી લીધો હતો.

વન ડે મેચમાં માત્ર 21.3 ઓવરમાં જ પરિણામ આવી ગયું હતુ. સિરાજને પ્લેયર ઓફ ધ મેચ અને કુલદીપને 9 વિકેટ ઝડપવા બદલ પ્લેયર ઓફ ધ સિરીઝ જાહેર કરવામાં આવ્યો હતો. વર્લ્ડકપને આડે હવે ત્રણ સપ્તાહ કરતાં પણ ઓછો સમય બાકી રહ્યો છે, ત્યારે ટીમ ઈન્ડિયાએ પાંચ વર્ષમાં પહેલીવાર મલ્ટી-નેશન ટુર્નામેન્ટ જીતી વિશ્વવિજયનો ઈરાદો સ્પષ્ટ કર્યો હતો. ભારત આ અગાઉ 2018માં જે બહુરાષ્ટ્રીય ટુર્નામેન્ટ જીત્યું તે એશિયા કપ જ હતો, જે પણ રોહિતની આગેવાનીમાં જ ટીમ ઈન્ડિયાએ જીત્યો હતો. વરસાદના કારણે વિલંબથી શરૂ થયેલી વન ડેમાં શ્રીલંકાએ ટોસ જીતીને બેટિંગ પસંદ કરી હતી.

બુમરાહે પહેલી જ ઓવરમાં પરેરાની વિકેટ ઝડપી હતી. જે પછી સિરાજે તેની બીજી અને ઈનિંગની ચોથી ઓવરમાં નિસાંકા, સમરવિક્રમા, અસાલાન્કા અને ધનંજયાની વિકેટ ઝડપતાં શ્રીલંકા 8/1થી 12/5 પર ફસડાયું હતુ. તેણે શનાકાની પણ વિકેટ ઝડપતાં માત્ર 16 જ બોલમાં પાંચ વિકેટની સિદ્ધિ હાંસલ કરી હતી અને 12/6 પર ફસડાયેલી શ્રીલંકાની હાર નિશ્ચિત બની ગઈ હતી. મેન્ડિસે (17) અને હેમંથાએ (13*)એ સ્કોરને 50 સુધી પહોંચાડયો હતો. સિરાજનો સાથ આપતાં હાર્દિકે 3 વિકેટ ઝડપી હતી. જવાબમાં ગીલ (27*) અને કિશન (23*)ની જોડીએ માત્ર 6.1 ઓવરમાં જ વિના વિકેટે 51 રન કરતા ભારતને 43.5 ઓવર બાકી હતી, ત્યારે 10 વિકેટથી પ્રભુત્વસભર જીત અપાવી હતી.