ભારત-ઈંગ્લેન્ડ વચ્ચે ધર્મશાળા ટેસ્ટના એક દિવસ પહેલા જે અટકળો લગાવવામાં આવી રહી હતી તે સદંતર ખોટી સાબિત થઈ છે. મેચના પ્રથમ દિવસે, ન તો વરસાદ થયો કે ન તો ફાસ્ટ બોલરોને પિચમાંથી મદદ મળી. આખો દિવસ મેદાન સારો પ્રકાશ રહ્યો અને સ્પિનરોએ તમામ 10 વિકેટો લીધી, સાથે જ પહેલા બેટિંગ કરતા ઈંગ્લેન્ડ 218 રનમાં આઉટ થઈ ગયું. જોકે ભારતના બે સ્ટાર સ્પિનરોએ ઈંગ્લેન્ડને ઓલઆઉટ કર્યા બાદ જે કર્યું તેણે બધાનું દિલ જીતી લીધું હતું. પાંચમી ટેસ્ટ મેચના પહેલા દિવસે ઈંગ્લેન્ડે પ્રથમ બેટિંગ કરવાનો નિર્ણય કર્યો અને મજબૂત શરૂઆત કરી.

ત્યારબાદ કુલદીપ યાદવનો જાદુ શરૂ થયો, જેણે એક પછી એક ઈંગ્લેન્ડના બેટ્સમેનોને પેવેલિયન પરત મોકલવાનું શરૂ કર્યું. કુલદીપે પોતાની ઘાતક સ્પિન વડે ઈંગ્લેન્ડની પ્રથમ 6 વિકેટમાંથી 5 વિકેટ લઈને ઈંગ્લેન્ડની મોટા સ્કોરની આશા ખતમ કરી નાખી. દરમિયાન, અનુભવી સ્પિનર ​​અશ્વિને તેની 100મી ટેસ્ટમાં 4 વિકેટ લઈને નીચલા ક્રમને ખતમ કરી દીધો. આ પછી, તે દ્રશ્ય જોવા મળ્યું, જે કોઈપણ ક્રિકેટ ચાહક હંમેશા માટે યાદ રાખવા માંગશે.

ઈંગ્લેન્ડની છેલ્લી વિકેટ પડી ગયા બાદ ટીમ ઈન્ડિયા પેવેલિયન પરત ફરી રહી હતી ત્યારે કુલદીપે અમ્પાયર પાસેથી બોલ લઈને તરત જ અશ્વિન તરફ ફેંક્યો હતો, પરંતુ અશ્વિને તેને પાછો કુલદીપ તરફ ફેંકી દીધો હતો. કુલદીપ રાજી ન થયો અને ફરીથી બોલ અશ્વિનને આપ્યો પરંતુ આ વખતે સિરાજે આવીને બોલ પકડી લીધો અને અશ્વિનને આપવાનો પ્રયાસ કર્યો. અશ્વિન સહમત ન થયો અને બોલ કુલદીપને પાછો આપ્યો અને તેને આગળ આવવા અને ટીમનું નેતૃત્વ કરવા કહ્યું.

હકીકતમાં, કોઈપણ ક્રિકેટ ફોર્મેટમાં જ્યારે કોઈ બોલર એક ઈનિંગમાં 5 વિકેટ લે છે, ત્યારે તે તે બોલને સંભારણું (યાદગીરી) તરીકે પોતાની પાસે રાખે છે. કુલદીપે 5 વિકેટ ઝડપી હતી પરંતુ અશ્વિનની કારકિર્દીની આ 100મી ટેસ્ટ હતી અને તેણે 4 વિકેટ ઝડપી હતી તે જાણીને કુલદીપ આ બોલ અશ્વિનને આપવા માંગતો હતો. પરંતુ સિનિયર બોલર અશ્વિને બતાવ્યું કે ભલે આ તેની 100મી મેચ હોય, પરંતુ આજનો દિવસ કુલદીપના નામે હતો, કારણ કે 5 વિકેટ લેવી સરળ કામ નથી અને આવી સ્થિતિમાં કુલદીપ આ બોલનો હકદાર છે.